Jakija retranślatary na miažy maje na ŭvazie Ukraina?
Prezident Ukrainy Uładzimir Zialenski vystaviŭ ultymatum Alaksandru Łukašenku. Kijeŭ patrabuje ciaham tydnia adklučyć i demantavać retranślatary, jakija, pa mierkavańni Kijeva, karektujuć maršruty rasijskich dronaŭ. Pra što ŭvohule havorka?
Jak patłumačyli «Našaj Nivie» ŭ Belpol, retranślatary, pra jakija kaža Uładzimir Zielenski, — heta, chutčej za ŭsio, dadatkovaje abstalavańnie, raźmieščanaje na standartnych vyškach sotavaj suviazi biełaruskich mabilnych apierataraŭ.
Pryncyp jaho pracy raniej detalova tłumačyła «Lusterka». Rasijskija ŭdarnyja drony — u pryvatnaści, «Šachiedy» — vykarystoŭvajuć ich dla navihacyi i pieradačy danych (naprykład, videa ŭ realnym časie abo danych pra svajo stanovišča, chutkaść i inšyja paramietry). Adnak standartnaja bazavaja stancyja sotavaj suviazi «bje» na adlehłaść usiaho kala troch kiłamietraŭ, čaho niedastatkova dla kiravańnia dronami, jakija zalatajuć uhłyb terytoryi Ukrainy,
Kali ž na vyšku pastaŭleny nakiravany retranślatar abo ŭzmacnialnik, sihnał možna pasyłać na 30—50 kiłamietraŭ uhłyb čužoj terytoryi. Takoje abstalavańnie stvaraje kanał suviazi, nakiravany pramianiom u bok Ukrainy, kab dron moh za jaho «začapicca».
Dron lacić, trymajučy suviaź ź niekalkimi bazavymi stancyjami. Viedajučy chutkaść prachodžańnia sihnału da kožnaj ź ich, možna matematyčna dakładna vyličyć kaardynaty bieśpiłotnika. Ukraincy vykarystoŭvajuć hety mietad, kab źbivać drony, a rasijanie — kab ich vieści.
U pryvatnaści, havorka moža iści pra vyški na terytoryi Paleskaha dziaržaŭnaha radyjacyjna-ekałahičnaha zapaviednika. Vyški mabilnaj suviazi standartu LTE (4G) pačali źjaŭlacca ŭ biaźludnaj zonie zusim niadaŭna — u krasaviku.
Ilustracyjnaje fota
Vyški ŭ Homielskaj vobłaści na miažy z Ukrainaj — nie adzinyja, dzie moža być ustalavana dadatkovaje abstalavańnie, jakoje vykarystoŭvajecca ŭ vajskovych metach. Paćvierdziŭ heta ŭ svajoj pramovie i Uładzimir Zialenski.
«My zafiksavali, što ŭzdoŭž našaj miažy na terytoryi Biełarusi ŭstalavana śpiecyjalnaje abstalavańnie, jakoje pracuje na Rasiju, na rasijan, jakoje dapamahaje rasijanam nanosić udary dronami pa nas, pa našaj terytoryi.
My va Ukrainie viedajem pra čatyry takija retranślatary ŭ Biełarusi — mienavita ŭ Homielskaj i Bresckaj abłaściach. Mienavita dziakujučy takomu abstalavańniu nanosilisia ŭdary pa Žytomirskaj, Rovienskaj, Vałynskaj abłaściach, pa našaj enierhietycy, pa našaj čyhuncy — pa zvyčajnych haradach, pa našych vioskach. Biełaruś maje čas, kab demantavać hetaje abstalavańnie».
Ukraina nie nazvała łakacyj, u jakich jana fiksuje najaŭnaść takich retranślataraŭ.