Andrej Sibiha: Ukraina budzie prymać lustranyja miery ŭ adkaz na dziejańni Minska

Ministr zamiežnych spraŭ Ukrainy Andrej Sibiha zajaviŭ, što Kijeŭ budzie dziejničać pa pryncypie «lustranaha adkazu» na mahčymyja kroki Biełarusi. Pavodle jaho słoŭ, Ukraina pakul nie čakaje niepasrednaha ŭdziełu Biełarusi ŭ vajnie, ale ŭvažliva sočyć za ŭsimi patencyjnymi pahrozami.

Andrej Sibiha. Fota: AP Photo / Efrem Lukatsky

Andrej Sibiha adznačyŭ, što Kijeŭ zychodzić z taho, što biełaruskija ŭłady nie buduć uciahvacca ŭ vajnu, bo razumiejuć, što lubyja varožyja dziejańni atrymajuć adpaviedny adkaz.

Jon taksama paviedamiŭ, što napiaredadni Biełaruś nakiravała praz ukrainskuju ambasadu ŭ Minsku notu z prapanovaj uvieści peŭny asablivy režym naviedvańnia pamiežnaj zony — dazvolić ukraincam źbirać hryby i jahady na terytoryi Biełarusi. Pry hetym, pavodle słoŭ Sibihi, u dakumiencie jość spasyłki na pahadnieńni, jakija ŭžo nie dziejničajuć, bo Ukraina vyjšła jak z adpaviednych dakumientaŭ SND, tak i z dvuchbakovych damoŭlenaściaŭ ź Biełaruśsiu. Dziaržaŭnaja pamiežnaja słužba Ukrainy ŭžo aficyjna paviedamiła, što nie zacikaŭlenaja ŭ hetaj prapanovie.

Ministr dadaŭ, što ŭkrainskija raźviedvalnyja i inšyja słužby pastajanna kantralujuć situacyju ŭ Biełarusi. Pavodle jaho, jany analizujuć źmieny ŭ biełaruskim zakanadaŭstvie, rearhanizacyju vajskovych padraździaleńniaŭ, kolkaść vojskaŭ kala ŭkrainskaj miažy, sumiesnyja mierapryjemstvy Biełarusi i Rasii, a taksama mahčymaść vykarystańnia biełaruskaj infrastruktury dla napadaŭ na Ukrainu.

Sibiha padkreśliŭ, što papiaredžańni, jakija ahučvaje prezident Ukrainy, nie źjaŭlajucca pustymi zajavami, i biełaruskija ŭłady pavinny heta ŭśviedamlać.

Kamientary da artykuła