U Minsku raście kolkaść klijentaŭ haradskich łaźniaŭ
Pavodle danych pradpryjemstva «Haradskija łaźni», za studzień — maj 2026 hoda ahulnyja adździaleńni hetych ustanoŭ naviedali 178 342 čałavieki. Za anałahičny pieryjad minułaha hoda ich było 173 363, što amal na 5 tysiač mienš, piša ahienctva «Minsk-Naviny».
Fota: «Naša Niva»
Dyrektar pradpryjemstva Anatol Marčanka adznačyŭ, što kala 80 % pryrostu zabiaśpiečyła pašyreńnie sietki. U vieraśni 2025 hoda ŭ skład pradpryjemstva ŭvajšoŭ łaźnieva-azdaraŭlenčy kompleks «Malinaŭka» na vulicy Kasmanaŭtaŭ. Jašče kala 20 % rostu źviazvajuć z prachałodnym nadvorjem u pieršyja piać miesiacaŭ hoda i paźniejšym pačatkam dačnaha siezona.
U toj ža čas častka pastajannych naviedvalnikaŭ, jakija prychodzili pieravažna dziela basiejna, pierajšła ŭ novyja azdaraŭlenčyja kompleksy.
Jak adznačajuć na pradpryjemstvie, viasnoj i letam kolkaść naviedvańniaŭ tradycyjna źmianšajecca na 25—30 % u paraŭnańni z vosieńniu i zimoj. Na heta ŭpłyvajuć siezon adpačynkaŭ, dačnyja kłopaty i školnyja kanikuły.
U letni pieryjad niekatoryja łaźni pracujuć pa skaročanym hrafiku. Pieršaj na taki režym pierajšła łaźnia ŭ mikrarajonie Sokał. Pry hetym łaźnieva-azdaraŭlenčyja kompleksy «Łaźnia», «Sucharava», «Łaźnia № 1» i 7‑ia łaźnia praciahvajuć pracu amal bieź źmien. Akramia taho, ustanovy časova zakryvajucca na pieryjad płanavych adklučeńniaŭ haračaj vady, kali pravodziacca kaśmietyčnyja ramonty.
Usiaho ŭ strukturu pradpryjemstva «Haradskija łaźni» ŭvachodzić 12 hramadskich łaźniaŭ.
Čytajcie taksama:
Na dačnych učastkach chočuć zabaranić łaźni z saŭnami
«Chvastać ludziej nie treba». Biełarus pryjechaŭ u Polšču i staŭ parmajstram