Hanicie chvaroby vienikam!

Łaźnievy vienik — reč, bieź jakoj łaźnia prosta-taki stračvaje ŭvieś svoj sens. Ź niezapamiatnych časoŭ našy prodki karystalisia hetym niachitrym masažnym prystasavańniem. Zdavałasia b, vieniki ŭsie adnolkavyja — tolki pa žorstkaści adroźnivajucca. Adnak nie! Vienik vieniku nie roŭny.

Biarozavy

U vienika ź biarozy prychilnikaŭ choć adbaŭlaj, i nievypadkova amatary łaźni ličać jaho samym lepšym. Tłumačeńnie tamu prostaje: jon vielmi hnutki i dastatkova tryvały. Dziakujučy porystaj i šurpataj pavierchni biarozavaha lista jon dobra prylahaje da skury i cudoŭna ŭbiraje pot. Liście biarozy ŭtrymlivaje efirnyja alei, dubilnyja rečyvy, vitamin S, pravitamin A.

Paśla «pracy» vienika skura stanovicca hładkaj i aksamitnaj. Jon dobra ačyščaje jaje ad sypu i hnajničkoŭ, paskarajučy zahojvańnie ran i drapin, akazvaje zaspakajalnaje dziejańnie. Biarozavy vienik źmianšaje boli ŭ myšcach i sustavach paśla fizičnych praktykavańniaŭ i nahruzak. A jašče paśla jaho vielmi lohka dychajecca. Sprava ŭ tym, što jon sadziejničaje rasšyreńniu drobnych bronchaŭ, razredžvańniu makroty i palapšeńniu vientylacyi lohkich. Tamu dla astmatykaŭ i kurcoŭ biarozavy vienik prosta niezamienny.

Dubovy

Pa raznastajnaści lekavych ułaścivaściaŭ dubovy vieničak ni ŭ čym nie sastupaje biarozavamu, a na dumku niekatorych parylščykaŭ, navat pieraŭzychodzić jaho. Dubovy vienik bolš tryvały, a tamu moža vykarystoŭvacca niekalki razoŭ. Vialikija, šyrokija, ščylnyja listy vydatna nahniatajuć paru, tamu rasparany dubovy vienik asabliva dobry dla tych, chto lubić hruntoŭna prahrecca. Praŭda, jość maleńkaje «ale»: dubovyja listy krychu horš ubirajuć pot.

Zatoje dubovy vienik słavicca supraćzapalenčym i dubilnym efiektam, ačyščaje pory, robić skuru matavaj i pruhkaj. Mienavita tamu jon padychodzić ludziam z tłustaj skuraj. A jašče hety vienik supakojvaje niervovuju sistemu i zdymaje stres. Cikava taksama, što vodar dubovaha liścia pieraškadžaje praźmiernamu pavyšeńniu arteryjalnaha cisku ŭ parylni.

Krapiŭny

Z vysokim arteryjalnym ciskam taksama dapamahaje spravicca i vieničak z krapivy. Akramia taho, jaho rekamiendujuć ludziam z reŭmatyčnymi bolami, a taksama tym, chto pakutuje ad niepryjemnych adčuvańniaŭ u sustavach i myšcach paśla fizičnych nahruzak. Sucišeńnie bolu źviazanaje z mahutnym miascovym razdražnialnym, adciahvalnym, supraćzapalenčym dziejańniem krapivy.

Lipavy

Pa svaich ułaścivaściach vielmi padobny na biarozavy. Jon zabiaśpiečvaje vydatny abiazbolvalny efiekt, asabliva dobra zdymaje hałaŭny bol. Hety vienik vyznačajecca miakkim uździejańniem na nyrki i potavyja załozy, što zabiaśpiečvaje mačahonny efiekt i ŭzmocnienaje potaadździaleńnie. Vienik ź lipy prosta niezamienny pry prastudnych zachvorvańniach: jon dziejničaje jak haračkapanižalny srodak i vyvodzić ź lohkich usiu makrotu.

Eŭkaliptavy

Hajučyja ŭłaścivaści hetaha vienika źviazanyja z utrymańniem u im efirnaha aleju. Pary eŭkaliptu, jak viadoma, cudoŭna lečać kašal, nasmark i bol u horle. U parylni vienik možna padnieści da tvaru i padychać niekalki chvilin. Praŭda, jość u eŭkaliptavaha vienika i niedachop: jaho halinki vielmi tonkija i hnutkija, a listy — doŭhija, tamu im niazručna arudavać padčas parki.

Jadłoŭcavy

Jadłoviec bahaty na efirny alej, arhaničnyja kisłoty, dubilnyja rečyvy. Akramia hetaha, jon vałodaje mahutnymi bakterycydnymi ŭłaścivaściami. Niahledziačy na toje, što vienik z halinak jadłoŭcu davoli kalučy, usio ž jość niamała śmielčakoŭ, jakija žadajuć paparycca im. I nievypadkova, bo jon dapamahaje pry padahry, reŭmatyźmie, aciokach. A jašče jon pryznany rekardsmien pa źniščeńni chvarobatvornych mikrobaŭ i vysypak na skury.

Chvojny

Biezumoŭna, chvojnyja vieniki — zadavalnieńnie dla amataraŭ, jakija pa svaim fizičnym stanie zdolnyja vynieści hetu praceduru. Dla niepadrychtavanaha čałavieka masaž takim vienikam moža stać sapraŭdnym vyprabavańniem. U toj ža čas chvojny vienik niezamienny pry bolach u pazvanočniku, radykulicie i nieŭrałhii. Reč u tym, što jon stymuluje krovazvarot hłyboka ŭ myšcach i va ŭnutranych orhanach. Pieravaha chvojnaha vienika ŭ tym, što jaho nie treba narychtoŭvać u zapas, a možna zrabić niepasredna pierad łaźniaj. Zamočvać taki vienik treba na praciahu dziesiaci chvilin, kab jon staŭ miakkim, i tolki tady možna pačynać parycca.

Nie apiačyciesia!

Parycca vienikam — cełaja navuka. Jaje viedaje nie kožny. Voś niekalki załatych praviłaŭ, jakich treba prytrymlivacca.

Vienik pavinien być vilhotnym. Dla hetaha jaho treba pieryjadyčna zmočvać u ciopłaj vadzie.

Vienik — heta nie pryłada dla katavańnia, i sens parki nie ŭ tym, kab adchvastać adzin adnaho jak maha macniej. Ruchi parylščyka pavinny być miakkimi, vienikam treba tolki źlohku dakranacca da cieła.

Kali ŭ parylni vielmi horača, pracujcie vienikam jašče bolš aściarožna: haračaja para moža mocna apiačy skuru.

• 0
• 0
• 0
• 0
• 0
• 0
• 0
• 0