Niepahadź pavaliła šmat dreŭ na Hrodzienščynie i Minščynie

Mocnaja niepahadź, jakaja prajšła 1 lipienia, zakranuła Hrodzienskuju i Minskuju vobłaści. Pavodle infarmacyi MNS, paryvy vietru dasiahali 20 mietraŭ za siekundu, u vyniku čaho paciarpieli šeść nasielenych punktaŭ.

Fota: MNS

Stychija paškodziła dachi vaśmi žyłych damoŭ i dźviuch haspadarčych pabudoŭ. Ciapier na ŭsich paciarpiełych abjektach pravodziacca adnaŭlenčyja raboty.

U Hrodzienskaj vobłaści było zarehistravana 29 vypadkaŭ padzieńnia dreŭ na prajeznuju častku aŭtamabilnych daroh. Ratavalniki vyjazdžali dla likvidacyi nastupstvaŭ u Ašmianskim, Vaŭkavyskim, Voranaŭskim, Hrodzienskim, Iŭjeŭskim, Navahrudskim, Śvisłackim, Smarhonskim i Ščučynskim rajonach, a taksama ŭ Hrodnie.

U Minskaj vobłaści supracoŭniki MNS trojčy vyjazdžali na raśpiłoŭku pavalenych dreŭ u Vałožynskim rajonie i Maładziečnie. U adnym vypadku dreva paškodziła lehkavy aŭtamabil.

U vyniku niepahadzi nichto nie paciarpieŭ.

Kamientary da artykuła