Muzyčny kiraŭnik dziciačaha sadka z Karmy razam z žonkaj staŭ zorkaj sacsietak. Užo navat buchoha Ihara abyšoŭ

Na staronku Valera Aŭsiankova ŭ Threads padpisana amal 64 tysiačy čałaviek. Dyk a čym ža ździŭlaje mužčyna, jaki 22 hady zajmajecca ź dziećmi muzykaj u viaskovym sadočku?

Valer Aŭsiankaŭ z žonkaj Irynaj. Tut i dalej fota ź jaho staronki ŭ Threads

Mahčyma, ludzi nastolki stamilisia ad influjensieraŭ ź ich idealnym žyćciom u sacsietkach, što chočuć bačyć u stužcy prostaha čałavieka. Nie čarhovuju instadzivu, jakaja adpačyvaje na Maldzivach dy pakutuje praz toje, što smažany vaśminoh u lubimym restaranie siońnia byŭ niasmačnym, a zvyčajnaha mužčynu z ahraharadka.

U žyćci Valera niama ničoha, što chacia b namiakała na paśpiachovy pośpiech. Sam rodam ź vioski Łapacina Homielskaha rajona, štohod jeździć tudy kaladavać.

Jamu 43 hady — i 23 ź ich mužčyna pracuje ŭ dziciačym sadku ŭ ahraharadku Chizaŭ. Pryjechaŭ pa raźmierkavańni i vyrašyŭ zastacca. Valer — muzyčny kiraŭnik vyšejšaj katehoryi.

Ciapier žyvie ŭ ahraharadku Karma, čatyry razy na tydzień chodzić adtul na pracu — kali pieššu, kali chto padkinie. Zarablaje štomiesiac rubloŭ 500‑600 — bo pracuje na pałovu staŭki.

Taksama ŭžo dzieviać hadoŭ biełarus słužyć panamarom u miascovym chramie.

Sa svajoj žonkaj Valer niekali paznajomiŭsia praz hazietu: daŭ tudy abviestku, što šukaje dziaŭčynu, i pakinuŭ svoj numar telefona. U 2013 hodzie jon ažaniŭsia ź Irynaj.

Mužčyna sprabavaŭ publikavać toje-sioje ŭ instahramie dy tyktoku, ale pośpiechu nie mieŭ. U śniežni pośpiech buchoha Ihara dalacieŭ i da Karmy — tady ž Valer i padumaŭ, ci nie pačać vieści Threads.

I pieršy ž dopis zavirusiŭsia. Letaś u studzieni Valer apublikavaŭ videa śviatkavańnia svajho 43‑ha dnia naradžeńnia. Znoŭ ža, nijakaj raskošnaj raskošy dy aŭtamabila ŭ padarunak.

Na videa mužčyna trymaje ŭ rukach prosty tort sa śviečkami, a jaho žonka za kadram śpiavaje Happy birthday to you. A paśla taho, jak imianińnik zadźmuŭ śviečki, kaža: «Z dniom naradžeńnia, Valeračka! Ščaścia, zdaroŭja, usiaho tabie samaha-samaha… Taho, što ty sam sabie žadaješ. Usiaho dobraha».

Dopis nabraŭ bolš za 585 tysiač prahladaŭ, 47 tysiač łajkaŭ i 2200 kamientaroŭ. Kaniečnie, niechta pasprabavaŭ samaśćviardžacca za košt Valera i navat prykłaŭ svajo fota da kamientara — maŭlaŭ, ja vyhladaju lepš u takim uzroście.

Ale ž sam biełarus śćviardžaje, što zusim nie pabačyŭ niehatyvu — zatoje byŭ u šoku ad taho, kolki ludziej sa ŭsiaho śvietu jaho pavinšavała. Pryjemnyja słovy pisali z Amieryki, Brazilii, Aŭstralii, Tajłanda, Japonii… Valer kaža, što ŭ niejki momant pryjšłosia navat vyklučyć telefon, bo toj prosta razryvaŭsia ad biaskoncych paviedamleńniaŭ.

Paśla taho, jak pra mužčynu napisaŭ «Anłajnier», nieznajomyja ludzi pačali pieraličvać jamu hrošy — ahułam atrymałasia 5400 rubloŭ. Dla siamji heta była prosta kaśmičnaja suma.

Ciapier na akaŭnt Valera padpisana amal 64 tysiačy čałaviek. Pakazvaje jon samyja prostyja rečy: zimoj hulaŭ ź Irynaj (amal 41 tysiača łajkaŭ), zrabiŭ ranišnik da 8 sakavika (27,7 tysiačy łajkaŭ), pakazaŭ svajo lubimaje miesca pa darozie damoŭ — zakinutuju viosku (17,4 tysiačy łajkaŭ), uziaŭ chaładzilnik u rasterminoŭku (5,7 tysiačy łajkaŭ).

A pieršy miljon prahladaŭ mužčynie prynieśli fota, jak jon pavinšavaŭ žonku sa śviatam — nabyŭ sušy zamiest torta (81,3 tysiačy łajkaŭ).

Ludzi pišuć: «A vy zaŭvažyli, što navat Threads stamiŭsia ad falšyvych ludziej dy napisanych ŠI dopisaŭ? I prasoŭvaje realnaje žyćcio».

Pakazalna, što kali artysty Kupałaŭskaha teatra pryjechali ŭ Karmu sa śpiektaklem, pajšli fatahrafavacca z Valeram i Irynaj.

Pačalisia ŭžo i pieršyja padarunki ad brendaŭ. Naprykład, Tramp.by padaryli Valeru ź Irynaj dvuchmiesny namiot — praŭda, błohier ščyra pryznaŭsia, što tak i nie zmoh sabrać jaho.

Kampanija «Marozpradukt» uručyła skryniu marožanaha «Kapryz». Kafe «Haraž» pačastavała picami. A ŭ chutkim časie siamja pajedzie ŭ Hruziju na 16 dzion — adna z turystyčnych kampanij padaryła adpačynak la mora.

Darečy, Valer pryznaŭsia, što sam byŭ na mory apošni raz ažno ŭ 90-ja, a Iryna ŭvohule nikoli.

A buchi Ihar užo adstaje ad ćviarozaj zorki Threads — jon maje kala 50 tysiač padpisčykaŭ.

Kamientary da artykuła