Akcior Kupałaŭskaha teatra pachvaliŭsia, što ŭžo 5 hadoŭ hraje ŭ «Paŭlincy». Ale napisaŭ z pamyłkaj
Małady akcior Kupałaŭskaha teatra Illa Kruk, jaki pryjšoŭ u trupu paśla pratestaŭ 2020 hoda, padzialiŭsia ŭ sacsietkach svaim honaram i bolem.
«5 let, kak ja užie ihraju Jakima v znamienitoj «Paŭlinkie». P.S. Za eto vriemia prošło około 250 pokazov śpiektakla», — napisaŭ akcior pa-rusku ŭ Threads.
A paśla, prykłaŭšy skrynšot niečaha kamientara, što jon zajmaje miesca talenavitych akcioraŭ, jakich vycieśnili praź ich niazhodu z režymam, dadaŭ:
«I ŭžo 5 hadoŭ, jak ja atrymlivaju takija kamientary ŭ svoj adras, u adras svaich kalehaŭ i siabroŭ, 5 hadoŭ tamu heta było vielmi strašna, zdavałasia, što ja złydzień, nie akcior — a hańba, što maja karjera skončana.
A ciapier ja razumieju, što ja zajmajusia svajoj lubimaj spravaj, dla niekatorych adkryvaju śviet biełaruskaj kultury i mastactva.
Dyk ci vartyja hetyja kamientary čyjhości losu? Chiba robić heta śviet śviatlejšym i dabrejšym?»
Ciapier u kamientarach da dopisu akcioru jamu zrabili zaŭvahu, što jon z pamyłkaj napisaŭ pra śpiektakl (pravilna — u «Paŭlincy»).
«Škada, što hrajučy ŭ «Paŭlincy» na biełaruskaj movie, vy nie ŭ stanie napisać pa-biełarusku, a jašče i robicie hrubuju pamyłku ŭ kančatkach biełaruskich słoŭ».
«Prykra, što akciory Kupałaŭskaha navat biełaruskaj movaj nie karystajucca i nie mohuć vyvučyć, što pravilna ŭ «Paŭlincy». Ale čaho čakać ad takoha teatra».
Niekatoryja pryhadali i razhrom teatra paśla 2020 hoda.
25‑hadovy Illa Kruk z Bresta. Jon vypusknik Biełaruskaha dziaržaŭnaha ŭniviersiteta kultury i mastactvaŭ. Jon staŭ samym maładym akcioram, jaki kali-niebudź ihraŭ Jakima, i adnym z samych maładych kupałaŭcaŭ. U Kupałaŭski jon pryjšoŭ na 4‑m kursie.
Džon Koŭł pryjedzie ŭ Biełaruś 15 vieraśnia. Łukašenka, adnak papiaredziŭ: «vialikaj ździełki» nie budzie10
Kamientary