Na Sož spuścili «Pasiejdona». U Homieli stvaryli sučasny ciepłachod z soniečnymi panelami i pieršym u Biełarusi vadamiotnym ruchačom
Prahułačnaje sudna, abstalavanaje ŭnikalnymi dla Biełarusi technałohijami, užo pačało vykonvać rejsy pa race Sož, prapanoŭvajučy pasažyram novy ŭzrovień kamfortu.
Novy ciepłachod «Pasiejdon» na race Sož u Homieli. Fota: promsm.by
Na račnyja maršruty Homiela vyjšaŭ novy pasažyrski ciepłachod «Pasiejdon». Adnapałubnaje sudna daŭžynioj amal 22 mietry raźličana na 50 pasažyraŭ i prapanuje sarakachvilinnyja prahułki pa maršrucie Lebiadzinaja sažałka — Lubienskaje voziera — Lebiadzinaja sažałka. Košt kvitka składaje ad 10 da 20 rubloŭ, a dzieci da 7 hadoŭ mohuć padarožničać biaspłatna.
Budaŭnictva ciepłachoda «Pasiejdon». Fota: promsm.by
Budaŭnictva ciepłachoda «Pasiejdon». Fota: promsm.by
Choć u aficyjnych paviedamleńniach praces nazyvajecca «madernizacyjaj», pa sutnaści, horad atrymaŭ całkam novy karabiel. Jak paviedamlaje vytvorca, «PramBudMiet», «pabudova ciepłachoda vykanana z nula». Prajekt, raspracavany ŭ «Biełsudnaprajekcie», pieratvaryŭ jaho ŭ sučasny i technałahičny abjekt.
Novy ciepłachod «Pasiejdon» na race Sož u Homieli. Fota: Biełsudnaprajekt
Hałoŭnaja techničnaja asablivaść «Pasiejdona» — vadamiotny ruchač, jaki vykarystoŭvajecca na pasažyrskim sudnie ŭ Biełarusi ŭpieršyniu. Takaja sistema značna źmianšaje asadku karabla i pavyšaje jaho manieŭranaść, što krytyčna važna dla ekspłuatacyi na niehłybokich rekach.
Ruchavik mahutnaściu 220 konskich sił dazvalaje «Pasiejdonu» raźvivać chutkaść da 15 km/h.
Novy ciepłachod «Pasiejdon» na race Sož u Homieli. Fota: promsm.by
Pałuba ciepłachoda. Fota: promsm.by
Cikavaść vyklikaje i sistema elektrazabieśpiačeńnia. Jana pabudavana pa hibrydnaj schiemie i składajecca z soniečnych panelaŭ na dachu, sučasnych lityj-žaleza-fasfatnych akumulataraŭ i hibrydnych inviertaraŭ. Hetaje rašeńnie nie tolki źmianšaje nahruzku na asnoŭny ruchavik, ale i robić sudna bolš ekałahičnym.
Asablivuju ŭvahu inžyniery nadali biaśpiecy. Na ciepłachodzie ŭpieršyniu ŭstalavali aŭtamatyčnyja elektryčnyja pompy: u vypadku avaryjnaj situacyi jany adpampujuć vadu z trumaŭ biez udziełu čałavieka.
Pasažyrski sałon ciepłachoda. Fota: promsm.by
Pasažyrski sałon abstalavany miakkimi siadzieńniami, televizaram i aŭdyjasistemaj. U adpaviednaści z patrabavańniami času, dla pasažyraŭ praduhledžanyja razietki z mahčymaściu zaradki hadžetaŭ praz razdymy USB i Type-C. Taksama na borcie ŭstalavany vakuumny tualet.