Miadźviedzi ŭsio bližej da stalicy: drapiežnika zaŭvažyli pad Ratamkaj
U Minskim rajonie znoŭ pabačyli miadźviedzia — jon vyjšaŭ na prasiołkavuju darohu pamiž Ratamkaj i vioskaj Kryžoŭka. Fota źviera apublikavaŭ žychar Minska ŭ Threads.
Pakolki hetaje miesca vielmi papularnaje siarod dačnikaŭ, viełasipiedystaŭ i miascovych žycharoŭ, jakija vyhulvajuć tam sabak, publikacyja vyklikała burnaje abmierkavańnie. Mnohija kamientatary pišuć, što zaniepakojenyja takimi navinami. Tyja, chto rehularna byvaje ŭ hetych lasach, adznačyli, što raniej sustrakali tam chiba što łasianiat, aleniaŭ ci zajcoŭ, ale da źjaŭleńnia miadźviedziaŭ hatovyja nie byli.
Niekatoryja dačniki zajavili, što ciapier bajacca tudy viartacca i buduć z aściarožnaściu płanavać svaje maršruty. «U mianie tam lecišča, ciapier strašna», «My ŭvieś čas jeździm pa hetaj darozie na rovarach», «Ja tak i viedała! Bolš tudy nie pajedu», — pišuć u kamientarach.
Častka karystalnikaŭ usumniłasia ŭ praŭdzivaści kadra i vykazała zdahadku, što fota mahło być zhienieravanaje štučnym intelektam. Adnak aŭtar dopisu heta abviarhaje.