U Vienhryi prypynili pracu i vybačylisia ŚMI, jakija byli asnovaj prapahandy Orbana. Jany buduć rearhanizavanyja

7 lipienia a 4‑j hadzinie dnia było spyniena viaščańnie hałoŭnaha praorbanaŭskaha telekanała M1. Na ekranie źjaviŭsia nadpis, što hramadskaje miedyja nie maje prava chłusić, i prabačeńni za toje, što na praciahu mnohich hadoŭ jano ŭsio ž rabiła heta, piša vydańnie telex.hu.

Kałaž: codastory.com

Paralelna spyniŭ pracu i praorbanaŭski sajt Hirado.hu, dzie naviedvalnikaŭ sustrakaje toj samy nadpis, a na praorbanaŭskim radyjo Kossuth hučyć tolki muzyka.

«Hramadskaje miedyja nie maje prava chłusić. Prosim prabačeńnia za toje, što na praciahu doŭhich hadoŭ my ŭsio ž heta rabili! Zaraz hramadskaje miedyja rearhanizujecca, kab u budučyni być niezaležnym i vartym davieru. Navinavaje viaščańnie časova prypyniena. Zastavajciesia z nami!» — taki nadpis hledačy bačać na svaich ekranach, uklučyŭšy telekanał M1

Zhodna z zajavaj, apublikavanaj infarmacyjnym ahienctvam MTI, užo ŭviečary telekanał M1 časova adnović pracu ŭ novym farmacie, ź filmami i biez navinavaha viaščańnia. Taksama biez navin buduć i tranślacyi na radyjo. Paralelna z farmiravańniem novaj dyrekcyi navin infarmacyjnyja prahramy buduć, jak abiacajecca, viartacca pastupova i płanava.

Hety pierachod, jak padkreślivajecca, istotna nie zakranie inšyja płatformy z prahramami, jakija nie adnosiacca da infarmacyjnaha viaščańnia, naprykład, spartyŭnyja prahramy buduć tranślavać bieź źmienaŭ hrafiku.

Premjer-ministr Vienhryi Pieter Madźjar u fejsbuku nazvaŭ spynieńnie orbanaŭskaj prapahandy histaryčnaj padziejaj.

Sam Madźjar i šerah inšych palitykaŭ tady apazicyjnaj, a ciapier kiroŭnaj partyi «Cisa» jašče padčas parłamienckaj vybarčaj kampanii zajaŭlali, što paśla svajoj pieramohi spyniać partyjnuju prapahandu ŭ hramadskich miedyja, jakaja finansujecca za dziaržaŭny košt. Fłahmanam prapahandy partyi «Fides» byŭ mienavita kanał M1, jaki padčas kiravańnia ŭradaŭ Orbana byŭ pierafarmatavany kiraŭnictvam hramadskaha miedyja ŭ kruhłasutačny infarmacyjny kanał.

Ciapier paviedamlajecca pra zamienu kiraŭnictva ŚMI, zvolnienyja taksama niekatoryja viadomyja prapahandysty. Paśla zaviaršeńnia pierachodnaha pieryjadu pastajannyja kiraŭniki hramadskich miedyja buduć abranyja na konkursnaj asnovie.

Kamientary da artykuła