Prezident Vienhryi admoviŭsia vykonvać patrabavańnie Madźjara adnosna adstaŭki
Prezident Vienhryi Tamaš Šujok adchiliŭ patrabavańnie skłaści svaje paŭnamoctvy da kanca maja, jakoje vystaviŭ jamu novy premjer-ministr krainy Pieter Madźjar. Pra heta palityk skazaŭ u intervju vienhierskamu vydańniu Index.
Raniej Pieter Madźjar zajaviŭ, što Šujok nijakim čynam nie moža pradstaŭlać Vienhryju jak prezident, i pastaviŭ jamu dedłajn da 31 maja, kab pakinuć pasadu.
Na heta vienhierski prezident adkazaŭ, što niama nijakich kanstytucyjnych padstaŭ, jakija zmusili b jaho pajści ŭ adstaŭku, tamu jon zastaniecca viernym svajoj prysiazie i płanuje praciahvać pracavać na pasadzie, pakul «vykanańnie abaviazkaŭ nie stanie niemahčymym».
«Katehoryja nieadekvatnaści i niazdatnaści (heta Madźjar zakidvaŭ Šujoku — red.) nie ŭvachodzić u Kanstytucyju Vienhryi. Heta palityčnyja pohlady, i jak by ja ni chacieŭ ich prakamientavać, ale mnie nie treba mieć spravu z palityčnymi pohladami. Kanstytucyja nie viedaje takich katehoryj», — kaža Šujok.
Prezident Vienhryi taksama zajaviŭ, što eks-premjer Viktar Orban paprasiŭ jaho stać prezidentam i skazaŭ, što partyja «Fides» padtrymlivaje jaho kandydaturu. Užo paśla abrańnia na pasadu Šujok, maŭlaŭ, kansultavaŭsia z Orbanam prykładna raz na miesiac, adnak «nie atrymlivaŭ nijakich parad».
Premjer-ministr Pieter Madźjar rezka adreahavaŭ na zhadanaje intervju. Jon zajaviŭ u sacyjalnych sietkach, što zajava prezidenta śviedčyć pra toje, što «era Orbana ŭsio jašče zachoŭvaje svaje pazicyi», i što sam Šujok «straciŭ davier bolšaści hramadstva».
Madźjar abvinavaciŭ kiraŭnika dziaržavy ŭ tym, što jon zastajecca palityčna źviazanym z byłym łahieram partyi «Fides» i nie pradstaŭlaje ŭsiu nacyju. Kiraŭnik urada taksama abviaściŭ ab dalejšym palityčnym cisku na prezidencki pałac.
Pavodle słoŭ Madźjara, dalejšaja prysutnaść Šujoka na pasadzie prezidenta pieraškadžaje adnaŭleńniu davieru da dziaržavy paśla hadoŭ kiravańnia Viktara Orbana.
Upieršyniu Madźjar zaklikaŭ prezidenta pajści ŭ adstaŭku adrazu paśla pieramohi na parłamienckich vybarach, padčas mitynhu.
«Ja zaklikaju prezidenta Respubliki nieadkładna paprasić pieramožcu sfarmiravać urad, a potym pajści ŭ adstaŭku. Ja zaklikaju ŭsich maryjanietak, jakija znachodzilisia pry ŭładzie na praciahu apošnich 16 hadoŭ, zrabić toje samaje», — skazaŭ Madźjar.
U Vienhryi ŭpieršyniu vyklikali rasijskaha pasła dla tłumačeńniaŭ pra vajnu
Paplečnik Pietera Madźjara, videa z pałymianym tancam jakoha skaryła sacsietki, paŭtaryŭ jaho i na inaŭhuracyi VIDEA
U novym uradzie Vienhryi budzie nieviduščy ministr — jaki ŭžo staŭ majstram ajkido i jurystam
«Upieršyniu za hady ŭ zale niama ruskich» — Tusk tonka pakpiŭ z Orbana
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ3
Kamientary