«Ja nie maju mahčymaści ŭbačyć cieła syna i raźvitacca ź im pa-ludsku». Maci Cichana Klukača zapisała zvarot da jaho kamandziraŭ
23‑hadovy dobraachvotnik i były palitviazień Cichan Klukač zahinuŭ na froncie ŭ mai 2026 hoda. Z taho momantu prajšło ŭžo bolš za dva miesiacy, ale maci vajara Ina Kałackaja dahetul nie atrymała nijakaj kankretnaj infarmacyi pra abstaviny jaho śmierci i nie zmahła raźvitacca z synam.
Ina Kałackaja, Cichan Klukač. Kałaž
Ina Kałackaja apublikavała ŭ fejsbuku zvarot da kamandziraŭ jaje 23‑hadovaha syna — biełaruskaha dobraachvotnika Cichana Klukača z pazyŭnym «Franc».
Ina kaža, što choča viedać praŭdu, jakuju ad jaje chavajuć užo dva miesiacy.
«Ja nie viedaju, što z maim synam», — havoryć jana.
Pavodle jaje słoŭ, da jaje pastupaje roznaja infarmacyja ź niepravieranych krynic. Aficyjnaj ža infarmacyi niama.
«Ja nie hatovaja čakać jašče dva miesiacy. Ja baču, jak maci chavajuć svaich dziaciej va Ukrainie. Ja ž nie maju mahčymaści navat ubačyć cieła majho syna i niejak raźvitacca ź im pa-ludsku», — havoryć jana.
Ina kaža, što jaje syn byŭ hodnym čałaviekam, jaki «maksimalna karektna zaŭsiody staviŭsia da inšych ludziej i zaŭsiody dbaŭ pra svaich pabracimaŭ».
«Zaraz ja źviartajusia pa dapamohu. Pamiać majho syna nie pavinna być ściortaja…» — prosić jana.
Cichan Klukač zahinuŭ u pieršaj pałovie maja 2026 hoda. Jaho cieła ŭdałosia dastać. Pa infarmacyi «Našaj Nivy», pa stanie na ciapierašni momant jano znachodzicca ŭ morhu. Adnak niama peŭnaści, ci ŭsie abaviazkovyja ekśpiertyzy ŭžo byli praviedzienyja.