Zialenski anansavaŭ adkryćcio archivaŭ pa Vałynskaj trahiedyi
Prezident Ukrainy Uładzimir Zialenski zajaviŭ, što Kijeŭ adkryje archivy Słužby biaśpieki Ukrainy i Słužby źniešniaj raźviedki, jakija tyčacca trahičnych padziej XX stahodździa na Vałyni. Pra heta jon paviedamiŭ paśla narady, pryśviečanaj raźvićciu adnosin z Polščaj.
Pomnik achviaram Vałynskaj trahiedyi ŭ polskim Piaremyšlskim paviecie. Fota: powiat.przemysl.pl
Pavodle słoŭ Zialenskaha, pa vynikach narady vyznačyli piać asnoŭnych krokaŭ dla palapšeńnia ŭkrainska-polskaha supracoŭnictva.
«Pieršaje: buduć rašeńni na dypłamatyčnym kirunku. Druhoje: buduć adkrytyja ŭsie archivy Słužby biaśpieki Ukrainy i Słužby źniešniaj raźviedki Ukrainy datyčna trahičnych padziej XX stahodździa na Vałyni. Treciaje: buduć rašeńni dla vydačy dadatkovaj istotnaj kolkaści dazvołaŭ na pošukavyja ekshumacyjnyja raboty, i razam z polskim bokam my pavinny zabiaśpiečyć bolšuju mahčymaść dla praviadzieńnia takich rabot», — paviedamiŭ jon.
Akramia taho, baki majuć namier pašyrać hramadski dyjałoh pamiž dźviuma krainami. Zialenski taksama prapanavaŭ uzmacnić mahčymaści Ukrainskaha instytuta nacyjanalnaj pamiaci i zaklikaŭ razhledzieć pytańnie ab pavieličeńni jaho finansavańnia.
Apošnim časam adnosiny pamiž Ukrainaj i Polščaj zastajucca napružanymi. Adnoj z pryčyn stała rašeńnie ŭkrainskaha kiraŭnictva nadać adnamu z vajskovych padraździaleńniaŭ hanarovaje najmieńnie «Hierojaŭ UPA», što vyklikała krytyku ŭ Polščy. Paśla hetaha polski bok pryniaŭ šerah rašeńniaŭ, źviazanych z acenkaj histaryčnych padziej i ŭšanavańniem pamiaci achviar Vałynskaj trahiedyi. Siarod inšaha prezident Polščy Karal Naŭrocki pazbaviŭ Zialenskaha polskaha Ordena Biełaha Arła, paśla čaho adbyŭsia demarš troch byłych prezidentaŭ Ukrainy i inšych vysokich čynoŭnikaŭ, jakija ŭ znak salidarnaści admovilisia ad svaich uznaharod.
Čytajcie taksama:
Karal Naŭrocki zaklikaŭ polski Siejm zabaranić ściah UPA
Kačyński: Ukraina nie ŭstupić u ES, kali nie źmienić svoj kurs