32‑hadovuju nastaŭnicu historyi ź Minska asudzili pa palityčnaj spravie

Kaciaryna Žohal šmat hadoŭ vykładała ŭ škole. Ale niadaŭna jaje asudzili za «sadziejničańnie ekstremisckaj dziejnaści».

Kaciaryna Žohal. Fota: Ukantakcie

Kaciarynie Žohal 32 hady. Jana pachodzić ź vioski Hłybačka Ušackaha rajona Viciebskaj vobłaści. U 2015 hodzie dziaŭčyna skončyła histaryčny fakultet BDU, a ŭ 2016‑m atrymała stupień mahistra histaryčnych navuk. 

Bolš za 12 hadoŭ Kaciaryna zajmałasia padrychtoŭkaj školnikaŭ da CT i CE pa historyi i hramadaznaŭstvie. Jana taksama pracavała nastaŭnicaj u staličnaj škole №124, vykładała ŭ adukacyjnym centry Equal i viała viačernija kursy ŭ Biełaruskim dziaržaŭnym univiersitecie zamiežnych moŭ (były «iniaz»).

Vykładčyca maje vyšejšuju kvalifikacyjnuju katehoryju, a vučni pakidali pra jaje vyklučna stanoŭčyja vodhuki jak pra lubimaha nastaŭnika.

Niadaŭna žančynu asudzili ŭ Minskim haradskim sudzie pavodle častki 1 artykuła 361‑4 KK (sadziejničańnie ekstremicskaj dziejnaści).

Žohal prysudzili chatniuju chimiju.

Masavyja palityčnyja represii ŭ krainie pačalisia paśla 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ joj ułady, a zmusiŭ jaje vyjechać za miažu. Heta vyklikała masavyja narodnyja pratesty, u jakich udzielničali miljony ludziej. U adkaz na heta ŭłady raspačali aryšty.

Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony jak minimum 9594 čałaviek, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy) začapili kala 500 tysiač biełarusaŭ. Niekalki socień tysiač ludziej vymušanyja byli pakinuć krainu. 

«Ekstremizmam» ułady Biełarusi ličać patrabavańnie pravieści svabodnyja vybary z prazrystym padlikam hałasoŭ, a taksama praktyčna ŭsialakuju krytyku ŭładaŭ, prarasijskich histaryčnych naratyvaŭ, prajavy salidarnaści z Ukrainaj, antyvajennyja vystupy. 

Kamientary da artykuła