Para z Hrodna pryjechała ŭ Minsk, kab addać afierystam usie hrošy
Usio pačałosia sa zvanka ŭ miesiendžary nibyta ad sartavalnaha centra «Biełpošty»: žančynie paviedamili pra zakazny list z padatkovaj i paprasili nazvać kod z SMS.
Zatym joj patelefanavaŭ łže-supracoŭnik centra kibierbiaśpieki. Jon zajaviŭ, što ad jaje imia ažyćciaŭlajucca pieravody hrošaj za miažu (na sumu 10 tysiač rubloŭ), i dla vyrašeńnia prablemy treba vykonvać ukazańni «jurysta Nacyjanalnaha banka». Taja zapatrabavała padpisać zajavu ab nierazhałošvańni infarmacyi, paviedamlaje «Milicyja Minska».
Paśla adbyŭsia videazvanok ad łže-pravaachoŭnika. Jon pryhraziŭ pieratrusam i kanfiskacyjaj źbieražeńniaŭ, prapanavaŭšy «biaśpiečny» varyjant — zadekłaravać hrošy i pieradać ich na ekśpiertyzu.
Muž žančyny taksama pavieryŭ u hetuju historyju. Para sabrała ŭsie siamiejnyja źbieražeńni — 60 tysiač rubloŭ u ekvivalencie — i adviezła najaŭnyja ŭ Minsk, dzie pieradała ich kurjeru kala adnaho sa staličnych chramaŭ.
Padman raskryŭsia, kali muž i žonka raskazali pra zdareńnie dačce. Jana adrazu zrazumieła, što heta machlarstva, pra jakoje nieadnarazova čuła ź miedyj.
Apieratyŭniki ŭstanavili asobu kurjera. Im akazaŭsia žychar susiedniaj dziaržavy, jaki vyviez hrošy i pieradaŭ ich pasiaredniku.