Viačasłaŭ Daniłovič, jaki haniŭ bieł-čyrvona-bieły ściah i chvaliŭ Stalina, staŭ adnym z kiraŭnikoŭ Akademii navuk
Prapahandyst Viačasłaŭ Daniłovič staŭ akademikam-sakratarom Adździaleńnia humanitarnych navuk i mastactvaŭ Nacyjanalnaj akademii navuk Biełarusi. Jaho proźvišča źjaviłasia na aficyjnym sajcie ŭstanovy, zaŭvažyła «Lusterka».
Fota: Ont.by
Čałaviek, jaki zajmaje hetuju pasadu, kuryruje pracu ŭsich humanitarnych struktur NAN. Heta instytuty historyi, sacyjałohii, fiłasofii, ekanomiki i inšyja.
Viačasłaŭ Daniłovič pa śpiecyjalnaści historyk-piedahoh. U NAN jon pierajšoŭ u 2006 hodzie ŭśled za svaim kiraŭnikom z BDPU Alaksandram Kavaleniem. Mienavita Kavalenia z 2009 hoda zajmaŭ pasadu akademika-sakratara, ale sioleta jamu spoŭniłasia 80 hadoŭ, i, vierahodna, jon vyjšaŭ na piensiju, pieradaŭšy pasadu svajmu prateže.
Daniłovič paśpieŭ pabyć kiraŭnikom Instytuta historyi, rektaram Akademii kiravańnia, a ŭ 2024 hodzie staŭ deputatam Pałaty pradstaŭnikoŭ. Jon źjaŭlajecca adnym z hałoŭnych ekśpiertaŭ dziaržaŭnaj prapahandy, rehularna vystupajučy ŭ dziaržaŭnych ŚMI i na telebačańni.
U žniŭni 2020 hoda Daniłovič u teleefiry sprabavaŭ dyskredytavać bieł-čyrvona-bieły ściah, śćviardžajučy, što heta ściah kałabarantaŭ (majučy na ŭvazie BNR), jakija nibyta navat nie źbiralisia stvarać niezaležnuju dziaržavu. Hetyja zajavy adrazu ž byli abvierhnutyja inšymi historykami.
Taksama Daniłovič uschvalaŭ Iosifa Stalina, jaki byŭ inicyjataram masavych represij: «Toj ža Iosif Visaryjonavič Stalin adyhraŭ vialikuju rolu ŭ dasiahnieńni pieramohi, jak by my da jaho ni stavilisia. Tamu što adna sprava, kali patryjatyčna nastrojena hramadstva, ale vielmi važna, kali hetamu hramadstvu jość vakoł kaho abjadnacca. Jość lidar — jak u nas u Respublicy Biełaruś», — kazaŭ jon.