Za minułyja sutki biełarusy paviedamili pra paŭtysiačy vypadkaŭ telefonnaha machlarstva

Za minułyja sutki ŭ orhany ŭnutranych spraŭ Biełarusi pastupiła kala 500 paviedamleńniaŭ pra telefonnyja zvanki ad ašukancaŭ, paviedamlaje pres-słužba MUS.

Zdymak ilustracyjny. Fota: «Naša Niva»

Pavodle infarmacyi siłavikoŭ, dziakujučy apieratyŭnym dziejańniam milicyi i pilnaści hramadzian udałosia praduchilić bolšaść sprob machlarstva. Pry hetym było zarehistravana 46 złačynstvaŭ, učynienych z vykarystańniem infarmacyjna-kamunikacyjnych technałohij.

Adździeł arhanizacyi apracoŭki machlarskich apieracyj MUS za hety čas inicyjavaŭ błakiroŭku dziesiaci fišynhavych internet-resursaŭ, jakija imitavali sapraŭdnyja internet-kramy, banki abo inšyja servisy. Akramia taho, była zabłakavanaja mahčymaść praviadzieńnia płaciažoŭ na karyść 70 zamiežnych płaciežnych rekvizitaŭ, jakimi karystalisia machlary, a taksama prypynienyja raschodnyja apieracyi pa 99 bankaŭskich rachunkach.

Supracoŭniki milicyi taksama zatrymali dvuch kurjeraŭ, jakija, pavodle źviestak śledstva, pracavali na telefonnych ašukancaŭ. Padčas zatrymańnia ŭ ich kanfiskavali kala 70 tysiač rubloŭ.

Pa infarmacyi MUS, najbolš raspaŭsiudžanaj schiemaj zastajucca telefonnyja zvanki, kali złamyśniki vydajuć siabie za słužbovych asob. Dalej pavodle kolkaści vypadkaŭ iduć machlarstvy pry kupli tavaraŭ praź internet, kradziažy z vykarystańniem sacyjalnych sietak i padman pad vyhladam inviestycyj abo handlu na finansavych biržach.

U viedamstvie adznačyli, što praca pa vyjaŭleńni i spynieńni dziejnaści internet-machlaroŭ praciahvajecca. Hramadzianam nahadvajuć, što prapanovy chutkaha i lohkaha zarobku abo kupli tavaraŭ pa padazrona nizkich cenach u internecie časta akazvajucca machlarskimi schiemami. Pry atrymańni padazronych telefonnych zvankoŭ u MUS rajać adrazu spyniać razmovu i paviedamlać pra heta ŭ milicyju pa numary 102.

Kamientary da artykuła