Dakumientalny film režysiora z Baranavičaŭ Andreja Kuciły pakažuć na Vieniecyjanskim kinafiestyvali
Dakumientalnaja karcina «Listy z maŭklivaj krainy» biełaruskaha dakumientalista z Baranavičaŭ Andreja Kuciły trapiła na Vieniecyjanski kinafiestyval — adzin z najprestyžniejšych kinafiestyvalaŭ śvietu.
Andrej Kuciła. Fota: andrei.kutsila / Facebook
Film, pryśviečany biełaruskim palitviaźniam, pakažuć pa-za konkursam.
Praca nad hetaj poŭnamietražnaj dakumientalnaj stužkaj praciahvałasia bolš za piać hadoŭ. Jana raspaviadaje pra tonkuju, ale tryvałuju suviaź biełaruskich palitźniavolenych z rodnymi praz mury turmy — pra toje, jak heta suviaź trymajecca praź listy. Stužka stvorana mižnarodnaj kamandaj Polščy, Hiermanii i Litvy.
Sam režysior Andrej Kuciła na svajoj staroncy ŭ sacyjalnych sietkach vykazaŭ padziaku arhanizataram kinaforumu i ŭsim, chto dapamahaŭ u stvareńni stužki.
«My hłyboka ŭdziačnyja adboračnaj kamisii Vieniecyjanskaha kinafiestyvalu za toje, što jany dali našamu filmu najlepšaje mahčymaje miesca dla suśvietnaj premjery!
Ščyraja padziaka našym mužnym hierojam i kožnamu čałavieku dy kožnaj arhanizacyi, jakija spryčynilisia da hetaha prajekta za apošnija piać hadoŭ, dapamahajučy danieści historyi biełarusaŭ z maŭklivaj krainy da mižnarodnaj aŭdytoryi», — napisaŭ Kuciła.
«Listy» stanuć pieršym dakumientalnym filmam ad aŭtara ź niezaležnaj Biełarusi, pakazanym na hetaj placoŭcy.
Andrej Kuciła — viadomy biełaruski dakumientalist, suzasnavalnik Biełaruskaj niezaležnaj kinaakademii. Siarod jaho viadomych prac — filmy Summa, «Kali kvietki nie maŭčać». Jon źjaŭlajecca łaŭreatam šmatlikich mižnarodnych i nacyjanalnych kinaforumaŭ.
Paśla vybaraŭ 2020 hoda režysior žyvie i pracuje ŭ polskim horadzie Łodź.