Lvoŭski: Łuhinoj było b dobra žyć paru stahodździaŭ tamu, kali było modna skardzicca na sialan

«Niekatoryja ludzi naradzilisia nie ŭ svaju epochu».

Lŭ Lvoŭski i Taćciana Łuhina. Fota: skryn videa, BiełTA

U novym vypusku TOKu akademičny dyrektar BEROC Leŭ Lvoŭski prakamientavaŭ słovy hienieralnaj dyrektarki «Kamvola» Taćciany Łuhinoj, jakaja narakała, što ŭ biełarusaŭ drennaja kultura pracy, ludzi mała pracujuć.

Na dumku ekanamista, takija razvahi nahadvajuć skarhi pamieščykaŭ niekalki stahodździaŭ tamu.

«Ja dumaju, što niekatoryja ludzi naradzilisia nie ŭ svaju epochu. Voś hetaj spadaryni dobra było b žyć paru stahodździaŭ tamu. Tady jakraz było modna skardzicca na sialan. Zdajecca, bješ ich, a jany ŭsio roŭna moŭ nie viedajuć, vino drenna padajuć, bieze nie ŭmiejuć hatavać, usie niepiśmiennyja, žyvuć u brudzie», — iranična zaŭvažyŭ Lvoŭski na prośbu prakamientavać słovy Łuhinaj.

Ekanamist padkreśliŭ, što nie isnuje «drennych ludziej» abo «drennych rabotnikaŭ» u maštabie ŭsioj krainy.

«Kožny asobny čałaviek, viadoma, moža być drennym rabotnikam, ale kab cełaja nacyja była drennaj — takoha nie byvaje», — ličyć Lvoŭski.

Pavodle jaho, prablemy ŭźnikajuć nie praź ludziej, a praz drennyja instytuty i nieefiektyŭnaje kiravańnie.

Jon adznačyŭ, što biełarusy ničym nie sastupajuć žycharam susiednich krain ni pavodle adukacyi, ni pavodle pracoŭnaj etyki.

Lvoŭski upeŭnieny: «[Biełarusy] ničym nie horšyja za palakaŭ, za litoŭcaŭ. Ja nie dumaju, što jany značna horšyja za niemcaŭ, a tym bolš za francuzaŭ».

Niama padstaŭ kazać pra niejkuju asablivuju lanotu biełarusaŭ.

«Biełarusy šmat pracujuć. I kali pry hetym vy nie možacie arhanizavać sistemu tak, kab jany zarablali stolki ž, kolki ŭ susiednich krainach, to tut treba pahladzieć u lusterka i papraknuć siabie. Ale zaŭsiody lahčej skazać: «Tak-tak, heta ŭsio rabotniki ŭ nas nie chočuć pracavać», — reziumavaŭ ekanamist.

Kamientary da artykuła