Italjaniec stvaryŭ falšyvy antyčny amfiteatr i vadziŭ tudy turystaŭ za hrošy
Mužčyna śćviardžaŭ, što vyjaviŭ artefakty Staražytnaj Hrecyi i Ryma. Vyjaśniłasia, što jon stvaryŭ ich sam z taho, što było pad rukoj.
U Italii da 2 hadoŭ i 4 miesiacaŭ turmy asudzili 69‑hadovaha žychara pravincyi Vičenca, jaki zbudavaŭ falšyvy antyčny amfiteatr i braŭ z turystaŭ pa 40 jeŭra za ŭvachod na nieisnujučy «archieałahičny abjekt», raspaviadaje kanał «Spadčyna».
Dla stvareńnia tak zvanaha «Amfiteatra Bieryka» ŭ kamunie Arkuńjana budaŭniki maštabna źmianili łandšaft i vykapali pahłybleńnie ŭ schile ŭzhorka na ŭčastku płoščaj 5000 kvadratnych mietraŭ.
Prystupki byli vykładzienyja sa štučna sastaranych błokaŭ, prastoru dapoŭnili bietonnymi kałonami, hipsavymi statujami i štučnym vozieram.
U rekłamnych materyjałach haspadar abjekta Franka Małosa śćviardžaŭ, što jon asabista raskapaŭ hetyja hrečaskija, rymskija i niealityčnyja artefakty pry dapamozie nieviadomych archieołahaŭ.
Rasśledavańnie spravy ab niezakonnym budaŭnictvie i padrobcy tvoraŭ mastactva pačałosia jašče ŭ 2016 hodzie. Pieršapačatkovy prysud byŭ vyniesieny ŭ 2021-m, ale za kraty stvaralnik butaforyi adpraviŭsia tolki ciapier, paśla adchileńnia ŭsich apielacyj. Akramia turemnaha terminu, sud abaviazaŭ jaho vypłacić štraf u 3000 jeŭra i kampiensacyju municypalitetu, a taksama całkam likvidavać navabud, viarnuŭšy ŭzhorku jaho pieršapačatkovy pryrodny vyhlad (hetaje pradpisańnie dahetul zastajecca niavykananym).
«Hety vypadak — pakazalny prykład taho, jak u jeŭrapiejskaj pravavoj prastory rasceńvajecca stvareńnie histaryčnych simulakraŭ i śpiekulacyja na minułym. U toj čas jak u ajčynnych realijach uźviadzieńnie butaforskich mulažoŭ i imitacyja daŭniny časta zaachvočvajecca abo prachodzić pad šyldaj ahraturyzmu i dobraŭparadkavańnia, u Italii vytvorčaść architekturnych padrobak i samavolnaje skažeńnie łandšaftu kvalifikujecca jak kryminalnaje złačynstva z realnymi turemnymi terminami», — dadaje aŭtar kanała.