Dastaŭščyk ježy «Jandeks» u Maskvie zaśpiavaŭ na vulicy i staŭ zorkaj — im akazaŭsia chłopiec z Bresta

Małady biełarus Kanstancin pryjechaŭ u Maskvu, kab raźvivać karjeru ŭ muzycy, a pakul pajšoŭ pracavać kurjeram. Niadaŭna zavirusiłasia videa ź jaho śpievam — vyhladaje, chłopiec moža kidać dastaŭku.

Skrynšot videa: posledniykurier / Instagram

Videa ź biełarusam apublikavaŭ instahram-akaŭnt posledniykurier. U roliku Kanstancin, apranuty ŭ firmovuju kurtku dastaŭščyka «Jandeks» i z kurjerskim zaplečnikam, śpiavaje na vulicy uryvak ź pieśni rasijskaj hrupy Hi-Fi «Sied́moj lepiestok».

Rolik z hałasistym biełarusam zalacieŭ na 1,5 miljona prahladaŭ. Kamientatary pišuć pra toje, što biełarus jaŭna zajmajecca nie svajoj spravaj:

«Bracie, maja bulba pačakaje, rabi».

«Jość adčuvańnie, nibyta hety žoŭty zaplečnik treba viarnuć nazad».

«Davajcie Miju Bojku ŭ kurjery zamiest jaho terminova!».

Kanstancin Mucha naradziŭsia ŭ Breście. U 2022‑m jon pastupiŭ u maskoŭski ŭniviersitet RUDN na fakultet pad nazvaj Instytut suśvietnaj ekanomiki i biznesu, i vyhladaje, što sioleta skončyŭ univiersitet. U studenckija hady Kościa aktyŭna vystupaŭ na ŭniviersiteckaj scenie — naprykład, atrymlivaŭ tytuły nakštałt «Mister Studenctva».

Fota: mk_for_every / Instagram

Svaje treki biełarus vykładaŭ u sieciva i raniej, praŭda, takoha pośpiechu i blizka nie było. Ciapier chłopiec pracuje kurjeram u «Jandeks Ježa», a taksama pryśviačaje čas svajmu chobi — robić broški z tkaniny i bisiera. 

Fota: mk_for_every / Instagram

Vyhladaje, adnak, što ciapier času na broški ŭ jaho budzie mała. U kamientary da taho samaha rolika, jaki zrabiŭ Kościu znakamitym, pryjšoŭ chip-chopier z Łatvii YAMZY, jaki buduje karjeru ŭ Rasii. Jon prapanavaŭ Kanstancinu spradziusavać jamu pieśniu, i biełarus nie ŭpuściŭ šancu — jon užo pracuje z YAMZY nad pieśniaj. Bolš za toje, Kościa pryznajecca, što prapanova ad YAMZY daloka nie adzinaja, tamu možna čakać supracoŭnictva i ź inšymi pradziusarami.

Kamientary da artykuła