USU nanieśli ŭdar pa NPZ va Ufie

Ranicaj 1 žniŭnia ŭłady Baškartastana paviedamili pra ataku bieśpiłotnikaŭ na stalicu respubliki Ufu.

Fota z sacsietak

Kiraŭnik Baškartastana Radzij Chabiraŭ zajaviŭ, što srodki supraćpavietranaj abarony adbili napad, adnak paśla padzieńnia abłomkaŭ adnaho sa źbitych dronaŭ u pramysłovaj zonie ŭźnikła zadymleńnie. Pavodle jaho słoŭ, paciarpiełych niama, a ekstrannyja słužby likvidujuć nastupstvy.

Pavodle paviedamleńniaŭ i analizu videazapisaŭ ź miesca padziej, paśla ataki adbyŭsia pažar na naftapierapracoŭčym zavodzie «Bašnafta-Ufanaftachim». Nad pradpryjemstvam byli bačnyja vialikija słupy čornaha dymu. Ukrainskija manitorynhavyja resursy paviedamlali jak minimum pra try centry ŭzharańnia.

«Bašnafta-Ufanaftachim» uvachodzić u skład Ufimskaha naftapierapracoŭčaha kompleksu kampanii «Rasnafta». Zavod vypuskaje aŭtamabilnaje paliva, naftavy koks, zvadkavanyja hazy, sieru i inšyja naftapradukty. Razam z dvuma inšymi pradpryjemstvami kompleks pierapracoŭvaje da 23,5 miljona ton nafty za hod i ličycca adnym z najbujniejšych u Rasii.

Heta ŭžo nie pieršaja ataka na naftapierapracoŭčyja pradpryjemstvy Ufy. Raniej bieśpiłotniki nanosili ŭdary pa ich 25 červienia i 8 lipienia. Pramysłovaja zona, dzie raźmieščanyja zavody, znachodzicca prykładna za 1 500 kiłamietraŭ ad miažy z Ukrainaj.

Paśla paviedamleńniaŭ pra pahrozu bieśpiłotnikaŭ u Baškartastanie byŭ uviedzieny režym padvyšanaj niebiaśpieki. Na niekalki hadzin taksama spyniaŭ pracu aeraport Ufy, paśla čaho abmiežavańni byli źniatyja.

Jašče ŭ červieni kiraŭnik Baškartastana paviedamlaŭ, što ŭ rehijonie stvarajucca da sta mabilnych ahniavych hrup dla supraćdziejańnia bieśpiłotnikam. Paśla hetaha, pavodle adkrytych paviedamleńniaŭ, rehijon nieadnarazova padviarhaŭsia atakam. Siarod abjektaŭ, jakija ŭžo traplali pad udary, nazyvalisia liniejnyja vytvorča-dyśpietčarskija stancyi kampanii «Transnafta» i naftachimičny kompleks «Hazpramnaftachim Sałavat».

Kamientary da artykuła