Ukrainskija ataki na rasijskija NPZ stali bolš efiektyŭnymi dziakujučy novaj taktycy

Pavodle infarmacyi vydańnia, novaja taktyka dazvalaje vyvodzić pradpryjemstvy sa stroju na bolš praciahły čas, što ŭ vyniku robić adnaŭleńnie bolš darahim i składanym dla Rasii.

Apieratary ŭkrainskich bieśpiłotnikaŭ raskazali, što vybar celaŭ adbyvajecca nie vypadkova. Pierad udarami pravodzicca techničny analiz, u jakim udzielničajuć inžyniery-enierhietyki i śpiecyjalisty naftavaj haliny. Jany dapamahajuć vyznačyć, jakija vuzły NPZ źjaŭlajucca najbolš važnymi i jakija detali budzie składaniej za ŭsio zamianić.

Pry płanavańni apieracyj uličvajucca roznyja scenaryi. Kali bieśpiłotnik nie moža parazić asnoŭnuju cel z-za pracy rasijskaj supraćpavietranaj abarony abo prablem z navihacyjaj, jamu zadajuć zapasnyja varyjanty — inšyja zahadzia vyznačanyja abjekty.

Asnoŭnaja meta takoj stratehii — nie prosta nanieści škodu asobnamu zavodu, a parušyć pracu ŭsioj źviazanaj enierhietyčnaj sistemy. Ukrainskija śpiecyjalisty razhladajuć rasijskuju infrastrukturu jak sietku ŭzajemazaležnych abjektaŭ: NPZ, elektrapadstancyj i linij elektrapieradačy.

Analityki adznačajuć, što Ukraina stvaraje padrabiaznyja karty rasijskaj enierhasistemy i šukaje tak zvanyja vuzłavyja punkty — miescy, paškodžańnie jakich moža vyklikać značnyja zboi va ŭsioj sistemie. Asablivaja ŭvaha nadajecca abstalavańniu, jakoje ciažka chutka zamianić.

Akramia taho, ukrainskija padraździaleńni bieśpiłotnikaŭ pačali nanosić paŭtornyja ŭdary pa adnych i tych ža važnych elemientach NPZ da taho, jak rasijskija śpiecyjalisty paśpiejuć zaviaršyć ramont. Heta nie dazvalaje pradpryjemstvam całkam adnavić pracu.

Raniej asnoŭnaj cellu dla ŭdaraŭ byli taksama bujnyja naftavyja schoviščy. Dla ich paražeńnia vykarystoŭvalisia bojeprypasy z askołkavymi elemientami.

Jak padkreślivaje Financial Times, ukrainskija i rasijskija inžyniery dobra razumiejuć asablivaści enierhietyčnaj infrastruktury adzin adnaho, pakolki abiedźvie krainy atrymali šmat u čym padobnyja savieckija pramysłovyja sistemy.

Nastupstvy ŭdaraŭ užo adčuvajucca ŭ Rasii. U krainie praciahvajecca paliŭnaja napružanaść, źviazanaja sa źnižeńniem mahčymaściaŭ asobnych NPZ. Rasijskija ŭłady rychtujuć miery dla pašyreńnia impartu dyzielnaha paliva paśla taho, jak užo pačali zakuplać bienzin u Biełarusi, Kazachstana i Indyi.

Heta adbyvajecca na fonie taho, što raniej Rasija była adnym z najbujniejšych eksparcioraŭ dyzielnaha paliva. Značnaja častka vyrablenaha dyzielu pastaŭlałasia za miažu, ale ciapier častku resursaŭ davodzicca pieranakiroŭvać na ŭnutrany rynak.

Kab nie dapuścić deficytu ŭ Maskoŭskim rehijonie, Rasija pavialičvaje pastaŭki paliva ź Sibiry i zakupki ŭ Biełarusi. Adnak na ahulnanacyjanalnym uzroŭni prablemy z zabieśpiačeńniem palivam praciahvajuć zachoŭvacca.

• 14
• 0
• 1
• 0
• 0
• 0
• 0
• 0