U Breście mužčyna zdymaŭ u piensijanierki žyllo, a raźličvaŭsia hrašyma, skradzienymi ź jaje siejfa

U Breście zaviaršyli rasśledavańnie kryminalnaj spravy ab kradziažy ŭ asabliva bujnym pamiery. Paciarpiełaj stała 87‑hadovaja žycharka horada, jakaja źbirała svaje aščadžeńni na praciahu troch dziesiacihodździaŭ, paviedamlaje Śledčy kamitet.

Fota ilustracyjnaje

Pavodle materyjałaŭ śledstva, 45‑hadovy ŭradženiec Žabinki doŭhi čas arandavaŭ u piensijanierki letni domik na jaje prysiadzibnym učastku. Žančyna daviarała arandataru, bo jon dapamahaŭ joj pa haspadarcy. Ale sioleta ŭ lutym mužčyna vypadkova zaŭvažyŭ, dzie haspadynia chavaje kluč ad siejfa z hrašyma.

Skarystaŭšysia z adsutnaści žančyny, jon adkryŭ siejf i zabraŭ častku najaŭnych. Vykradzienyja srodki jon pakłaŭ na svoj bankaŭski rachunak, paśla čaho pačaŭ ich tracić. Pry hetym za arendu žylla jon raźličvaŭsia z haspadyniaj jaje ž ułasnymi hrašyma. Kali ž u mai vykradzienyja srodki skončylisia, mužčyna znoŭ zalez u siejf i zabraŭ jašče niekalki tysiač rubloŭ, jakija vykarystaŭ dla kupli aŭtamabila.

U pačatku červienia piensijanierka vyjaviła, što aščadžeńniaŭ stała mienš. Jana niedaličyłasia bolš jak 45 tysiač rubloŭ i źviarnułasia ŭ milicyju.

Padčas rasśledavańnia abvinavačany całkam pryznaŭ svaju vinu i dobraachvotna kampiensavaŭ naniesienuju škodu. Jamu vystaŭlena abvinavačańnie ŭ kradziažy ŭ asabliva bujnym pamiery. Pa rašeńni prakurora mužčynu ŭziali pad vartu da suda.

Kamientary da artykuła