U vojskach śpiecnazu pa zahadzie Łukašenki farmujuć padraździaleńnie ź niaŭdałych ahraryjaŭ i parušalnikaŭ dyscypliny
Viertykal zajaŭlaje pra vykanańnie zahadu Łukašenki.
Usie fota: Minabarony
U siły śpiecyjalnych apieracyj (SSA) pačali prybyvać rabotniki, jakija kiepska pracavali padčas žniva, paviedamiła pres-słužba Minabarony.
Inicyjatyva adpraŭlać takija kadry ŭ vojska naležyć Alaksandru Łukašenku, jaki 22 lipienia na sielektarnaj naradzie prapanavaŭ nakiroŭvać prahulščykaŭ i parušalnikaŭ na ŭkrainskuju miažu zamiest kryminalnaha pieraśledu: «Usich, chto nie ŭmieje pracavać, — u vojska i na paŭdniovuju miažu… Tydzień padrychtoŭki (hranatamiot, kulamiot) — i tudy».
Łukašenka padkreślivaŭ, što heta tyčycca jak zvyčajnych pracoŭnych, tak i čynoŭnikaŭ.
Minabarony aficyjna aformiła hetuju praceduru jak zbor z pryzyvam vajennaabaviazanych dla pravierki bajavoj i mabilizacyjnaj hatoŭnaści vajenkamataŭ.
Vajennaabaviazanyja prajšli punkt pryjomu, a tyja, chto raniej nie słužyŭ i viedaŭ pra vojska tolki ź filmaŭ, pryniali vajennuju prysiahu.
Z pryzvanych farmujuć asobny strałkovy bataljon. Na praciahu 60 sutak na palihonie ź imi praviaduć intensiŭnyja sutačnyja zaniatki pa ahniavoj, inžyniernaj i vajenna-miedycynskaj padrychtoŭcy (u tym liku ŭnačy i na addalenych łakacyjach), a taksama aznajomiać z novymi ŭzorami ŭzbrajeńnia.
«Paśla prachodžańnia kursa navučańnia jany buduć nakiravanyja ŭ rajony vykanańnia vučebna-bajavych zadač», — paviedamiła Minabarony.
Zhodna sa słovami Łukašenki, ich pavinny kinuć na ŭkrainskuju miažu.