U Minsku čynoŭniki admianili rasijskuju rejv-viečarynku
U Minsku admianili rejv-viečarynku «Stancyja mietro Horkaŭskaja», jakuju 15 žniŭnia płanavała pravieści adnajmiennaje tvorčaje abjadnańnie z rasijskaha Nižniaha Noŭharada. Arhanizatary paviedamili, što ŭžo atrymanaje hastrolnaje paśviedčańnie praz dva tydni adklikali, pry hetym aficyjnuju pryčynu im tak i nie nazvali, piša «Lusterka».
Rejv-viečaryna prajekta «Stancyja mietro Horkaŭskaja». Fota: telehram-kanał «HOŔKOVSKAJA»
Viečaryna musiła prajści ŭ art-prastory «ECHO» na terytoryi minskaha zavoda «Łuč». Kvitki kaštavali ad 105 da 205 rubloŭ.
Pra admienu arhanizatary paviedamili 8 žniŭnia.
«Učora ŭviečary administracyja vyniesła finalnaje rašeńnie pra admienu šerahu mierapryjemstvaŭ, u tym liku našaha. Aficyjnaj pryčyny my tak i nie atrymali», — havorycca ŭ paviedamleńni kamandy.
U poście nie ŭdakładniajecca, jakaja mienavita administracyja pryniała rašeńnie pra admienu viečaryny. Pry hetym hastrolnyja paśviedčańni na mierapryjemstvy ŭ Minsku vydaje strukturnaje padraździaleńnie Minharvykankama ŭ śfiery kultury — upraŭleńnie kultury Minharvykankama.
Pavodle ich słoŭ, padrychtoŭka minskaj padziei pačałasia jašče ŭ lutym, kali arhanizatary padali dakumienty na atrymańnie hastrolnaha paśviedčańnia.
«Praz 6 miesiacaŭ naša zajaŭka była razhledžana, my atrymali dazvoł i vyjšli ŭ anons. Praz dva tydni paśviedčańnie było adklikana, a prodažy kvitkoŭ prypynieny. Naša kamanda i partniory padziei ŭ Minsku zmahalisia, kab zachavać układzienyja siły i pravieści zadumanaje. Ale, na žal, hetych namahańniaŭ nie chapiła», — raspaviali arhanizatary.
Kamanda dadała, što raźličvaje ŭsio ž pravieści mierapryjemstva ŭ Minsku ŭ budučyni.
«My prahna čakali sustrečy z dabrakami-biełarusami i padrychtavali šmat siurpryzaŭ. Ale niama miesca dla smutku. My projdziem hety šlach znoŭ, mahčyma, niekalki razoŭ, kab adnojčy ŭ Minsku adčyniła svaje važkija dźviery «Stancyja mietro Horkaŭskaja», — napisali jany.
Kuplenyja kvitki možna viarnuć pa miescy nabyćcia.
«Stancyja mietro Horkaŭskaja» — tvorčaje abjadnańnie ź Nižniaha Noŭharada, jakoje źjaviłasia ŭ 2021 hodzie. Kamanda ładzić rejvy i multymiedyjnyja šou z elektronnaj muzykaj, śviatłom i vizualnymi efiektami, hastraluje pa Rasii i raźvivaje ułasny muzyčny łejbł GRK MUSIC.