Vučyč zajaviŭ, što śviet staić na parozie značna bolš maštabnaj vajny
Prezident Sierbii taksama zajaviŭ, što nie čakaje zakančeńnia rasijska-ŭkrainskaj vajny ni da kanca 2026 hoda, ni da viasny 2027 hoda.
Alaksandr Vučyč. Fota: Darko Vojinovic / AP
Prezident Sierbii Alaksandr Vučyč zajaviŭ, što ličyć ciapierašniuju situacyju pačatkam bolš maštabnaj vajny. Pra heta jon skazaŭ u padkaście staršyni praŭleńnia miedyjakancerna Axel Springer Macijasa Depfnera, apublikavanym 9 žniŭnia, paviedamlaje telekanał «Dožd́».
«Kali vy pytajeciesia, što asabista ja dumaju, — i ja nie budu tłumačyć, čamu tak dumaju, — to, na maju dumku, my znachodzimsia ŭ pačatku bolš maštabnaj vajny. Ja spadziavaŭsia, što da hetaha momantu niechta zrobić kroki dziela dasiahnieńnia miru. Hetaha nie adbyłosia, i ŭ bližejšy čas nie adbudziecca. Heta aznačaje, što my staim na parozie značna, značna bolš maštabnaj vajny», — skazaŭ Vučyč.
U razmovie Vučyč taksama zajaviŭ, što nie čakaje zakančeńnia rasijska-ŭkrainskaj vajny ni da kanca 2026 hoda, ni da viasny 2027 hoda. Jon patłumačyŭ heta tym, što baki znachodziacca ŭ tupiku, a kampramis, na jaho dumku, stanie mahčymym tolki paśla taho, jak adzin z bakoŭ atrymaje vidavočnuju pieravahu.
Vučyč taksama vykazaŭ mierkavańnie, što Uładzimir Pucin imkniecca ŭstalavać kantrol nad usim Danbasam i paśla hetaha moža być hatovy skončyć vajnu.
Prezident Sierbii zaklikaŭ ZŠA i jeŭrapiejskija krainy damahacca pieramovaŭ i spynieńnia ahniu, a nie čakać źniasileńnia rasijskich vojskaŭ. «Nichto nie choča miru. Usie chočuć parazy inšaha boku», — zajaviŭ jon, dadaŭšy, što vynikam vajny pavinien stać kampramis, a nie paraza adnaho z bakoŭ.