U Hrodnie admianili ŭsie kvizy
Intelektualna-zabaŭlalnyja hulni ŭ Hrodnie pryraŭniali da masavych mierapryjemstvaŭ. Praz heta arhanizatary ciapier pavinny atrymlivać na ich dazvoł. Bolšaść zapłanavanych na žnivień hulniaŭ admienienyja, piša Hrodna.life.
Pieršym pra admienu paviedamiŭ adzin z najstarejšych hrodzienskich kvizaŭ «Vspomniť vsie». Praź niekalki dzion stała viadoma, što nie budzie i inšych hulniaŭ.
«Usie hulni da 20 žniŭnia admienieny. Rehistracyi prypynieny», — napisali ŭ svaich sacsietkach arhanizatary kviza «Smuzi».
Časova spynilisia taksama inšyja kvizy: «Mazhabojnia», «Tuc-Tuc», «Uhadaj miełodiju» i «Matroška».
Hrodziency ŭ Threads aburajucca rašeńniem miascovych uładaŭ. Jany pišuć, što ŭ inšych haradach Biełarusi takich dazvołaŭ nie patrabujuć. A voś žychary inšych haradoŭ, naprykład Bresta, chvalucca, što ŭ ich, pa anałohii z Hrodnam, taksama pačnuć admianiać kvizy.
«Heta ž byŭ taki kłasny kulturny adpačynak dla hrodziencaŭ», — piša adna z karystalnic.
Dazvoł na praviadzieńnie masavaha mierapryjemstva vydajuć u miascovym vykankamie.
Padać zajavu treba za 15 dzion da padziei. U zajavie treba paznačyć danyja arhanizataraŭ, mety i miesca praviadzieńnia mierapryjemstva, a taksama mierkavanuju kolkaść udzielnikaŭ.
Kali mierapryjemstva traplaje pad katehoryju kulturna-vidoviščnaha, to jaho arhanizatar abaviazany być u rejestry Minkulta i mieć hastrolnaje paśviedčańnie.