U Biełarusi pavialičać kolkaść stancyj dla zaradki elektramabilaŭ

U Biełarusi płanujuć praciahnuć raźvićcio infrastruktury dla zaradki elektramabilaŭ. Adpaviednuju pastanovu ŭrada padpisaŭ premjer-ministr Alaksandr Turčyn. Dakumient praduhledžvaje abnaŭleńnie Prahramy stvareńnia dziaržaŭnaj sietki dla zaradki elektramabilaŭ z ulikam novaj redakcyi ŭkaza Łukašenki №92 «Ab stymulavańni vykarystańnia elektramabilaŭ».

Zdymak ilustracyjny. Fota: «Naša Niva»

U pryvatnaści, prahramu pryvodziać u adpaviednaść z novymi normami, pavodle jakich RUP «Biełtelekam» vyznačajecca druhim dziaržaŭnym apierataram, adkaznym za ŭstanoŭku i absłuhoŭvańnie pavolnych elektrazaradnych stancyj.

Pastanovaj taksama abnaŭlajucca mierapryjemstvy prahramy, pieralik miescaŭ i typaŭ elektrazaradnych stancyj, jakija byli ŭstanoŭlenyja abo płanujucca da ŭstanoŭki ŭ 2024—2028 hadach. Udakładniajucca miescy raźmiaščeńnia supierchutkich elektrazaradnych kompleksaŭ «Biełnaftachima» i arhanizacyj, jakija ŭvachodziać u jaho skład.

Akramia taho, budzie ŭdakładnieny pieralik miescaŭ raźmiaščeńnia zaradnych stancyj dla haradskoha elektryčnaha transpartu.

Asobna vyznačajucca miescy, dzie ŭ 2026—2030 hadach płanujecca ŭstaloŭvać pavolnyja elektrazaradnyja stancyi ŭ miežach dziaržaŭnaj sietki. Taksama vyznačajucca płany pa budaŭnictvie ŭ 2029—2030 hadach supierzaradnych kompleksaŭ «Biełnaftachima» ŭ nasielenych punktach i kala abjektaŭ prydarožnaha servisu.

Ciapier u Biełarusi pracujuć kala 1,2 tysiačy elektrazaradnych stancyj roznych apierataraŭ. Akramia «Biełnaftachima», sietki zaradnych stancyj raźvivajuć «Biełtelekam», «Biełsielelektrasietkabud», kampanii A-100, United Company i inšyja arhanizacyi.

Kamientary da artykuła