Babaryka: Ja nie patrebien Cichanoŭskaj i demakratyčnamu ruchu ni ŭ jakoj jakaści

Były palitviazień Viktar Babaryka zajaviŭ, što nie bačyć siabie ŭ dziejnaj sistemie biełaruskich demakratyčnych sił. Pra heta jon skazaŭ u intervju «Radyjo Svaboda» padčas kanfierencyi «Novaja Biełaruś» u Varšavie.

Viktar Babaryka. Fota: «Naša Niva»

Adkazvajučy na pytańnie, čamu jon nie śpiašajecca dałučacca da dziejnaści demakratyčnych sił jak hramadski i palityčny lidar, Babaryka skazaŭ, što ciaham paŭhoda analizavaŭ padziei apošnich šaści hadoŭ i sprabavaŭ zrazumieć, «nakolki ja mahu być patrebny palityčnym lidaram, rucham, jakija isnujuć».

«Majo vyznačeńnie palityčnaha aktyvista abo lidara, abo tym bolš prosta palityka, vielmi-vielmi składanaje, bo ja niejak davaŭ svajo paniaćcie, chto taki palityk. I kali ŭ 2020‑m hodzie ja im dakładna byŭ, to ciapier vielmi składana skazać, ci źjaŭlajusia ja palitykam.

Ja paŭhoda ci krychu bolš patraciŭ na toje, kab praanalizavać, a što, ułasna, za ŭsie hetyja 6 hadoŭ adbyłosia, i nakolki, jak mnie zdajecca, ja mahu być patrebny palityčnym lidaram, rucham, jakija isnujuć. I, jak i ŭ 20‑m hodzie, ja zrazumieŭ, što nikomu nie patrebny», — skazaŭ Babaryka.

Jon dadaŭ, što i ŭ 2020‑m hodzie «nie byŭ patrebny nikomu ź dziejnych partyj i lidaraŭ, jakija isnavali na toj momant».

«Taja samaja historyja nazirajecca i ciapier. To-bok ja nie patrebny dziejnym hulcam ni ŭ jakoj jakaści», — adznačyŭ jon.

Na pytańnie, ci prapanoŭvaŭ jon supracoŭnictva pradstaŭnikam demakratyčnych sił, Babaryka adkazaŭ admoŭna.

«Ja nikoli nikomu ničoha nie prapanuju. Kali ja kamuści patrebny, zvyčajna prychodziać i kažuć: «Słuchajcie, davajcie razam papracujem», — skazaŭ jon.

Kamientary da artykuła