Cichanoŭskaja pra Milinkieviča: Jaho addanaść Biełarusi natchniała
Śviatłana Cichanoŭskaja vykazała hłybokija spačuvańni rodnym, blizkim i ŭsim biełarusam u suviazi sa śmierciu palityka, vučonaha i hramadskaha dziejača Alaksandra Milinkieviča. Jana padkreśliła, što jaho śmierć — heta vialikaja i niepapraŭnaja strata dla ŭsioj krainy i demakratyčnaha ruchu.
«Ź ciažkim sercam daviedałasia pra toje, što ad nas syšoŭ Alaksandr Milinkievič. Čałaviek vyklučnaj hodnaści, śvietłaj dušy i śvietłaha rozumu, jaki staŭ dla mnohich z nas sapraŭdnym aryjenciram.
Dziakujučy svajoj mudraści i žyćciovamu dośviedu Alaksandr Uładzimiravič byŭ dla mianie nadziejnaj aporaj i čałaviekam, da čyjoj dumki ja zaŭsiody prysłuchoŭvałasia ź vialikaj pavahaj», — napisała Cichanoŭskaja.
Jana adznačyła, što palityk byŭ adnym z samych jaskravych i hodnych palitykaŭ svajho času. U 2006 hodzie zmoh abjadnać vielmi šmat roznych partyj i ruchaŭ, kab vykarystać vybary dla aktyvizacyi nacyjanalnych siłaŭ.
«Jaho addanaść Biełarusi, našaj movie i kultury natchniała kožnaha, kamu vypaŭ honar pracavać ź im pobač.
Alaksandr Uładzimiravič umieŭ abjadnoŭvać, słuchać i padtrymlivać u samyja składanyja momanty. Heta vielizarnaja i horkaja strata dla ŭsich nas», — napisała jana.
Cichanoŭskaja vykazała svaje spačuvańni siamji, rodnym, blizkim i ŭsim, kamu Alaksandr Uładzimiravič byŭ darahi.