Zbankrutavała firma, jakaja chacieła ŭkłaści ŭ vypusk suchoj sadaviny paŭmiljona dalaraŭ
Kaliści heta pradpryjemstva ličyłasia znakavym dla cełaha rajona.
Fota: vecteezy.com
U Bresckaj vobłaści Ekanamičny sud adkryŭ spravu ab bankructvie TAA «Ahrafudyndastry». Heta firma była stvorana ŭ 2016 hodzie i płanavała zapuścić u Hancavickim rajonie bujnuju vytvorčaść suchafruktaŭ i sušanaj harodniny. Rašeńnie suda zaŭvažyŭ Office Life.
Kaliści heta pradpryjemstva ličyłasia znakavym dla cełaha rajona. U 2017 hodzie jaho inviestprajekt vysoka aceńvali ŭ Bresckim abłvykankamie. Paviedamlałasia, što abjom inviestycyj u vytvorčaść u Hancavickim rajonie składzie 900 tysiač rubloŭ, abo bolš za $450 tysiač pa kursie na toj momant.
Kampanija «Ahrafudyndastry» płanavała arhanizavać bujnuju vytvorčaść suchafruktaŭ i sušanaj harodniny, naładzić ekspart bulbianoha piure i inšaj pradukcyi.
Užo tady inviestar stvaryŭ u rajcentry 17 novych rabočych miescaŭ.
Što pajšło nie tak — dakładna nieviadoma. Ale, sudziačy pa danych dziaržrejestra, u 2018—2019 hadach na pradpryjemstvie niekalki razoŭ mianiali kiraŭnika, a ŭ 2022‑m «Ahrafudyndastry» apynułasia na hrani bankructva. U dačynieńni da firmy navat zaviali spravu, ale litaralna praź niekalki miesiacaŭ jaje spynili.
Tym nie mienš viasnoj 2024‑ha ŭłaśnik abviaściŭ pra likvidacyju biznesu. A praz dva hady likvidatar padaŭ zajavu ab bankructvie, pakolki na pradpryjemstvie pa-raniejšamu visiać značnyja daŭhi, u tym liku pierad biudžetam.
Pa ahučanych u sudzie danych, TAA «Ahrafudyndastry» vinavata kredytoram amal 1,3 miljona rubloŭ. Ź ich pa abaviazkovych płaciažach — bolš za 275 tysiač, a doŭh pierad FSAN — kala 4,5 tysiačy rubloŭ.
Kančatkovy razhlad spravy ab bankructvie zapłanavany na 29 kastryčnika.