«Šukać sens jość». Jak iduć pošuki źnikłych u Kyrhyzstanie alpinistaŭ

U harach Kyrhyzstana praciahvajucca pošuki hrupy alpinistaŭ, siarod jakich dvoje biełarusaŭ — 43‑hadovy Maksim Palanski i 60‑hadovy Mikałaj Śvirydaŭ. Apošni raz jany, a taksama hramadzianin Litvy Siarhiej Rubcoŭ, vychodzili na suviaź 2 žniŭnia. Jak viadziecca apieracyja i čamu śpiecyjalisty ŭsio jašče ličać jaje metazhodnaj, raskazvaje «Anłajnier».

Fota ź instahram-staronki Alaksandra Śmirnova

20 lipienia troje alpinistaŭ prylecieli ŭ horad Oš, atrymali pahraničnyja propuski i dabralisia da startu maršrutu ŭ ciaśninie raki Kyzyłsu. Spadarožnikavy telefon nie pracavaŭ uvieś pachod, tamu suviaź była epizadyčnaj, praz kitajskaha apieratara. Mienavita pa hetaj pryčynie ŭ redkich paviedamleńniach hrupy nie było dakładnych kaardynat.

Na fota: Maksim Palanski, Siarhiej Rubcoŭ i Mikałaj Śvirydaŭ

U subotu, 1 žniŭnia, usie troje padnialisia na viaršyniu pika Kurumdy (6613 m) pa paŭnočnym hrebni. Na nastupny dzień ad hrupy pryjšło apošniaje paviedamleńnie, dzie havaryłasia pra hatoŭnaść vyjechać 4 žniŭnia ŭ 10:00. Mašyna dvojčy pryjazdžała da miesca pryznačeńnia, ale alpinistaŭ tam nie było.

Z 7 žniŭnia pošukami zajmajecca ratavalny atrad MNS Kyrhyzstana, a taksama dobraachvotniki. Na nastupny dzień u bazavym łahiery vyjavili pałatku-skład, ale ludziej pobač nie było.

Z 8 da 10 žniŭnia pošuki ŭskładnialisia drennymi ŭmovami nadvorja — išli śniehapady, i vierch maršrutu niemahčyma było ahledzieć. U aŭtorak nadvorje palepšyłasia, i ratavalniki zmahli niekalki razoŭ zapuścić drony, kab abśledavać niavyvučanyja ŭčastki mierkavanaha maršrutu.

Blizkija źnikłych stvaryli śpiecyjalny sajt, dzie publikujuć apošnija naviny i rekvizity dla finansavaj dapamohi. Dniami ŭ ŚMI źjaviłasia infarmacyja pra toje, što hrupa nibyta nie mieła strachoŭki. Ale žonka Maksima Palanskaha Kaciaryna zapeŭniła žurnalista «Anłajniera», što «hrupa była zastrachavanaja».

«Strachoŭka kampiensuje pošukava-ratavalnyja raboty limitam 10 000 dalaraŭ. Adzin vylet viertalota źjadaje jaho całkam. Usio astatniaje apłačvajuć siemji. Tamu adkryty zbor, — patłumačyŭ Alaksandr Śmirnoŭ, kiraŭnik śpiecyjalnaj hrupy z daśviedčanych alpinistaŭ. — U Maksima i Mikałaja jość zvańnie «Śniežnaha barsa» — usie piać siamitysiačnikaŭ byłoha SSSR. Usie troje razam prajšli pik Revalucyi. Takija ludzi ŭmiejuć doŭha trymacca ŭ avaryjnaj situacyi, tamu šukać sens jość».

U aŭtorak, 11 žniŭnia, da miesca pošukaŭ vylecieła žonka Maksima Palanskaha Kaciaryna. Siońnia jana pavinna prybyć u Oš, kab asabista ŭdzielničać u apieracyi. Na momant padrychtoŭki materyjału śladoŭ hrupy vyjaŭlena nie było.

Kamientary da artykuła