«U nas niama ich kaardynat, i heta hałoŭnaja składanaść apieracyi». Jak idzie pošuk źnikłych u harach Kyrhyzstana biełarusaŭ i litoŭca
Alaksandr Śmirnoŭ, jaki kiruje vyratavalnaj apieracyjaj, raskazaŭ u svaim fejsbuku, jak idzie pošuk i ź jakimi ciažkaściami sutyknulisia.
U harach Kyrhyzstana paśla ŭzychodžańnia na pik Karumdu źnikła hrupa z troch daśviedčanych alpinistaŭ: hramadzianina Litvy Siarhieja Rubcova i dvuch biełarusaŭ — Maksima Palanskaha i Mikałaja Śvirydava. Na suviaź jany nie vychodziać z 2 žniŭnia. Alaksandr Śmirnoŭ raskazaŭ u svaim fejsbuku, jak idzie pošuk i ź jakimi ciažkaściami sutyknulisia. Adkryty hrašovy zbor na dapamohu ŭ pošuku.
«Ja kiruju pošukavaj apieracyjaj na piku Kurumdy. Pišu, tamu što dalej my biez dapamohi nie spravimsia, — napisaŭ Alaksandr Śmirnoŭ u svaim fejsbuku.
1 žniŭnia ŭ 10:30 troje padnialisia na viaršyniu Kurumdy, 6613 mietraŭ, Zaałajski chrybiet. Maksim Palanski i Mikałaj Śvirydaŭ ź Biełarusi, Siarhiej Rubcoŭ ź Litvy. Išli pa paŭnočnym hrebieni. 2 žniŭnia paviedamili, što 4‑ha buduć hatovyja da vyjezdu. Bolš suviazi nie było. Kiroŭca pryjazdžaŭ u damoŭlenaje miesca 4 i 5 žniŭnia, hrupa nie vyjšła.
Usiudy staić 4 žniŭnia jak data apošniaha kantaktu. Heta pamyłka ź pieršaha paviedamleńnia MZS. Suviaź była 2-ha, a da 4‑ha jany tolki źbiralisia vyjści da mašyny. Roźnica ŭ dvoje sutak źmianiaje ŭsio razumieńnie terminaŭ.
U nas niama ich kaardynat, i heta hałoŭnaja składanaść apieracyi. Spadarožnikavy telefon nie zapracavaŭ za ŭvieś pachod, vydavaŭ Invalid position Kyrgyzstan. Usia suviaź išła z hrebienia praz kitajskaha apieratara, jaki łaviŭsia ŭryŭkami. Tamu ŭ apošnich paviedamleńniach niama nivodnaj kropki. My šukajem na maršrucie, a nie ŭ adnoj kropcy.
Što zroblena. Z 7 žniŭnia pracuje ratavalny atrad MNS Kyrhyzstana, da viečara ŭ rajonie było siem čałaviek. Dapamahaje šviejcarski hid Damian, jon byŭ tut miesiac tamu. 8 žniŭnia jon padniaŭ dron z vyšyni 4300 mietraŭ i znajšoŭ u bazavym łahiery pałatku hrupy. Ludziej pobač niama, pavodle ryštunku heta skład, jaki chłopcy pakinuli pierad vychadam navierch.
Ratavalnikam pieradadzienyja treki maršrutu, kaardynaty łahieraŭ 1, 2, 3 i mierkavanaj linii spusku. Vałanciory-alpinisty z Kyrhyzstana, Rasii i Šviejcaryi dapamahajuć dystancyjna.
U što ŭpiorlisia. Da 11 žniŭnia dziejničaje štarmavoje papiaredžańnie, u harach idzie śnieh, śladoŭ na schile ŭžo nie ŭbačyć.
Piešy pošuk spyniŭsia na ledaviku, pry takim prahnozie vychodzić na jaho nielha. Vierchniuju častku maršrutu ź ziamli ahledzieć u pryncypie niemahčyma. Dalej patrebny viertalot i ratavalniki, zdolnyja pracavać na vyšyni 5400 i 6000 mietraŭ.
Ciapier pra hrošy, prosta. Strachoŭki ŭ chłopcaŭ jość, ale pošukava-ratavalnyja raboty iduć u polisie asobnym padlimitam — 10 000. Adzin vylet viertalota ŭ hety rajon źjadaje jaho całkam. Usio, što zvyš, apłačvajuć siemji sa svaich srodkaŭ. Tamu adkryty zbor: lotnyja hadziny, praca vyšyńnikaŭ, dastaŭka ludziej u rajon, suviaź.
Ja nie budu abiacać, što my ich znojdziem, hetaha nie moža abiacać nichto. Ale ja viedaju hetych ludziej i viedaju ich uzrovień. U Maksima i Mikałaja jość zvańnie «Śniežny bars» — jany prajšli ŭsie piać siamitysiačnikaŭ byłoha SSSR.
Usie troje razam prajšli pik Revalucyi, kudy dachodziać adzinki. Heta nie zabłukałyja turysty. Ludzi takoha kłasa ŭmiejuć doŭha trymacca ŭ avaryjnaj situacyi, tamu šukać maje sens i ciapier. Ja budu vieści pošuki stolki, kolki my zmožam ich apłačvać.
Chronika pa dniach, rekvizity i spravazdačy ab kožnym raschodzie — na kurumdy.by. Zbor idzie tolki praz sajt. My nikoli nie pišam pieršymi i nie prosim pieravodaŭ u asabistych paviedamleńniach. Kali vam pryjšło takoje paviedamleńnie, heta machlary.
Čym možna dapamahčy, akramia hrošaj.
«Bolš za ŭsio ciapier patrebnyja ludzi, jakija ŭžo znachodziacca ŭ Kyrhyzstanie. Hrupy i vopytnyja alpinisty, u kaho jość aklimatyzacyja i dziejny pamiežny propusk, i chto hatovy vyjści ŭ bazavy łahier i papracavać razam z apieratarami dronaŭ. Aformić propusk z nula my nie paśpiavajem, heta dziesiać pracoŭnych dzion, tamu realna dapamahčy mohuć tolki tyja, chto ŭžo ŭ rajonie abo pobač. Kali heta pra vas ci vašych znajomych, napišycie mnie.
Patrebnyja kantakty pa viertalotach u Ošy i pa tych, chto sapraŭdy lotaŭ u Čon-Ałajski rajon», — napisaŭ Alaksandr Śmirnoŭ.
Kamientary