U Minsku źbirajucca źnieści paŭtary sotni budynkaŭ
U Minsku praciahvajuć pracu z avaryjnymi, zaniadbanymi i nieekspłuatavanymi budynkami, jakija mohuć stvarać niebiaśpieku dla žycharoŭ horada. Pytańnie znosu takich abjektaŭ abmierkavali na naradzie pad kiraŭnictvam staršyni Minharvykankama Uładzimira Kucharava, piša ahienctva «Minsk-Naviny».
Hałoŭny fasad budynka pa Pietrusia Broŭki, 5, jaki ciapier užo źniesieny. Fota: tut.by. Kab rasčyścić placoŭku pad novy miedycynski abjekt, unikalny budynak 1930‑ch hadoŭ raboty francuzskaha architektara daviałosia pazbavić achoŭnaha statusu
U inviestycyjnuju prahramu stalicy na 2026 hod uklučyli šeść budynkaŭ, jakija padlahajuć znosu. Paśla demantažu hetych abjektaŭ terytoryi pavinny pryvieści ŭ naležny sanitarny stan.
Dva takija budynki, jak paviedamlajecca, užo źnieśli. Adzin ź ich znachodziŭsia ŭ rajonie vulicy Pietrusia Broŭki (korpus byłoj abłasnoj dziciačaj balnicy), druhi — na vulicy Rabkaraŭskaj («stalinka» ŭ styli savieckaha kłasicyzmu). Ciapier raboty pravodziacca na abjekcie na vulicy Inžyniernaj i jašče na adnym budynku na vulicy Pietrusia Broŭki. Da kanca hoda ŭłady płanujuć źnieści jašče dva avaryjnyja abjekty.
Usiaho paśla praviedzienych abśledavańniaŭ u roznych rajonach Minska vyjaŭleny 151 prablemny budynak. Pavodle haradskich uładaŭ, usie hetyja zbudavańni nieprydatnyja dla dalejšaha vykarystańnia, tamu zachoŭvać ich niemetazhodna.
Asnoŭnym pryjarytetam pry naviadzieńni paradku čynoŭniki nazyvajuć biaśpieku i kamfort žycharoŭ. Zaniadbanyja budynki, maŭlaŭ, nie tolki paharšajuć vyhlad horada, ale i mohuć ujaŭlać realnuju niebiaśpieku dla dziaciej i darosłych.
Asobna na naradzie razhledzieli pytańnie ŭtrymańnia budynkaŭ i zbudavańniaŭ, jakija praciahły čas nie vykarystoŭvajucca. Pavodle źviestak Minskaha haradskoha ŭpraŭleńnia MNS, na adpaviednym uliku znachodziacca 52 takija abjekty.