Viasnoj pad Hrodnam źbirajucca adkryć «Stary horad»
Pad Hrodnam viasnoj 2027 hoda płanujuć adkryć novy kulturna-histaryčny park «Stary horad». Jon raźmieścicca ŭ ahraharadku Karobčycy i pavinien stać novym turystyčnym abjektam, jaki budzie pieranosić naviedvalnikaŭ u atmaśfieru minułaha. Na siońnia budaŭnictva vykanana prykładna na 70%, paviedamlaje TRK «Hrodna».
Fota: majontak «Karobčycy»
Ciapier na abjekcie praciahvajucca ŭnutranyja i źniešnija azdablenčyja raboty, a taksama zakuplajecca rekvizit dla budučych ekspazicyj i łakacyj. Nad kancepcyjaj parku pracujuć nie tolki budaŭniki, ale i historyki, pradstaŭniki śfiery kultury i adukacyi, a taksama śpiecyjalisty Hrodzienskaha ŭniviersiteta imia Janki Kupały.
Usiaho prajekt praduhledžvaje 13 tematyčnych łakacyj. U parku źjaviacca ratuša i čyhunačny vakzał, a taksama budynki, jakija adlustroŭvajuć roznyja baki žyćcia minułych epoch. Siarod ich — drukarnia, apteka i fotamajsternia.
Asobnaje miesca adviaduć handlovym radam z centralnaj płoščaj. Naviedvalniki taksama zmohuć naviedać karčmu, kaviarniu tradycyjnaj biełaruskaj kuchni, etnahrafičny kompleks i rycarskuju škołu.
Adnoj z admietnaściaŭ «Staroha horada» stanie art-abjekt pad nazvaj «Hadzińnik času». Pry jaho stvareńni vykarystali sapraŭdnyja detali starych drukarskich stankoŭ i miechanizmaŭ hadzińnikaŭ. Kožnuju hadzinu hety abjekt budzie demanstravać naviedvalnikam roznyja siužety, źviazanyja z historyjaj Hrodna.
Budaŭnictva parku praciahvajecca, i ciapier jaho hatoŭnaść aceńvajecca prykładna ŭ 70%. Adkryć «Stary horad» dla naviedvalnikaŭ raźličvajuć viasnoj 2027 hoda — da pačatku novaha turystyčnaha siezona ŭ Biełarusi.
Čytajcie taksama:
U Biełarusi stvorać novy zabaŭlalny park z histaryčnaj tematykaj
Pad Hrodnam adkryli harnałyžnuju trasu
Ruiny kaścioła ŭ Babrujsku biaspłatna addali «kašalku» Łukašenki Alaksandru Zajcavu