Pry ŭdary pa Samary, vierahodna, paškodzili cech, dzie vyrablajuć elektronnaje abstalavańnie dla rakiet-nośbitaŭ «Sajuz-2»

Pry siońniašnim načnym abstrele ŭkrainskimi rakietami Samary moh być paškodžany cech Rakietna-kaśmičnaha centra «Prahres», dzie vyrablajuć elektronnaje abstalavańnie dla rakiet-nośbitaŭ «Sajuz-2». Pavodle infarmacyi ŭkrainskaha OSINT-prajekta «KibierBorošno», pad udar moh trapić korpus 106A.

Skrynšot ź videa

Analityki śćviardžajuć, što hety korpus uvachodzić u vytvorčy kompleks «Sajuza» i pracuje ŭ režymie vysokaha kłasa čyścini. Tam źbirajuć bartavuju elektroniku, prybory i drukavanyja płaty — kampanienty, jakija zabiaśpiečvajuć pracu rakiety.

Pobač znachodzicca korpus 106B, dzie pravodzicca finalnaja zborka rakiet. Ci byŭ paškodžany jon, pakul nieviadoma.

RKC «Prahres» naležyć da struktury «Raskosmasu» i źjaŭlajecca asnoŭnym pradpryjemstvam sieryjnaj zborki rakiet «Sajuz-2». Akramia rakiet-nośbitaŭ, pradpryjemstva vyrablaje kaśmičnyja aparaty dystancyjnaha zandziravańnia Ziamli.

U vypadku značnaha paškodžańnia cecha adnaŭleńnie vytvorčaści moža być składanym i zaniać niekalki miesiacaŭ. Asabliva heta tyčycca pamiaškańniaŭ z vysokimi patrabavańniami da čyścini: paśla pažaru i tušeńnia nieabchodna nie tolki adnavić sam budynak, ale i paŭtorna siertyfikavać čystyja zony, technałahičnyja pracesy i pravieryć uzrovień zabrudžvańnia.

Ataka na kompleks adbyłasia ŭ noč na 15 žniŭnia. Paśla vybuchaŭ na terytoryi pradpryjemstva ŭźnik bujny pažar. Hubiernatar Samarskaj vobłaści Viačasłaŭ Fiedaryščaŭ paviedamiŭ pra jak minimum dvuch paciarpiełych.

Pra ŭdar pa «Prahresie» zajavili i ŭ Hienštabie Uzbrojenych sił Ukrainy. Prezident Ukrainy Uładzimir Zialenski śćviardžaŭ, što dla ataki vykarystoŭvalisia kryłatyja rakiety «Fłaminha». 

Pavodle ŭkrainskaha boku, «Prahres» taksama źviazany z vytvorčaściu kaśmičnaj hrupoŭki «Rasśviet», jakuju Rasija płanuje vykarystoŭvać dla naładžvańnia ŭłasnaj spadarožnikavaj suviazi. U Kijevie śćviardžajuć, što hetyja spadarožniki mohuć vykarystoŭvacca rasijskimi vajskoŭcami, u tym liku dla raźviedki i zabieśpiačeńnia suviazi.

Kamientary da artykuła