Rasija atakavała Kijeŭ balistykaj, na Zaparožža skinuli avijabomby
U noč na 16 žniŭnia rasijskija vojski nanieśli čarhovy masiravany ŭdar pa terytoryi Ukrainy, vykarystaŭšy balistyčnyja rakiety i ŭdarnyja bieśpiłotniki. Pad abstrełam apynulisia Kijeŭ, Kryvy Roh, Kamienskaje i Kremienčuk, a na Zaparožžy rasijskaja avijacyja skinuła kiravanyja avijabomby.
U Kijevie ŭ Abałonskim rajonie ŭspychnuŭ vialiki pažar na terytoryi viadomaha knižnaha rynku «Piatroŭka». Akramia taho, paškodžańni atrymali niekalki niežyłych budynkaŭ i pryparkavanyja pobač aŭtamabili. Pavodle paviedamleńniaŭ haradskich uład i ratavalnikaŭ, u vyniku abstrełaŭ ukrainskaj stalicy paciarpieli try čałavieki.
Trahičnyja nastupstvy byli ŭ Zaparožskim rajonie, jaki rasijskija vojski atakavali avijabombami. Adzin z udaraŭ pryjšoŭsia pa pryvatnym domie ŭ siale Viktaroŭka, u vyniku čaho zahinuli 66‑hadovy mužčyna i 64‑hadovaja žančyna. Jašče adna avijabomba paškodziła žyły dom u siale Michajłaŭskaje, dzie traŭmy atrymaŭ 39‑hadovy miascovy žychar.