Pasłańnik Trampa Kušnier sustreŭsia ź lidaram CHAMAS
Sustreča adbyłasia ŭčora ŭ Jehipcie.
Džared Kušnier. Fota: AP Photo/Terry Renna
Śpiecpasłańnik pa Blizkim Uschodzie i ziać prezidenta ZŠA Džared Kušnier pravioŭ pieramovy z pradstaŭnikami palestynskaj hrupoŭki CHAMAS, kab abmierkavać realizacyju padtrymanaha ZŠA mirnaha płana dla siektara Haza, paviedamiŭ Bi-bi-si paleścinski čynoŭnik.
Pavodle jaho słoŭ, sustreča adbyłasia ŭ niadzielu ŭ Jehipcie, delehacyju CHAMAS uznačalvaŭ novy lidar hrupoŭki Chalil al-Chaja.
U lipieni «Rada miru» (Board of Peace), stvoranaja ź inicyjatyvy Donalda Trampa, abviaściła pra dasiahnieńnie damoŭlenaści ab «poŭnym razzbrajeńni» CHAMAS i inšych hrupovak u siektary Haza.
Na minułym tydni Izrail adchiliŭ płan Trampa, jaki składajecca z 15 punktaŭ i praduhledžvaje vyvad izrailskich vojskaŭ i adnaŭleńnie siektara Haza pad kiravańniem novaj cyvilnaj paleścinskaj administracyi.
Premjer-ministr Izraila Bińjamin Nietańjachu zajaviŭ, što vyvad izrailskich vojskaŭ nie adbudziecca da taho času, pakul CHAMAS nie budzie «sapraŭdy razzbrojeny».
U niadzielu vosiem blizkaŭschodnich krain vystupili z zajavaj, u jakoj asudzili admovu Izraila pryniać hety płan.
«Rada miru» Trampa pieršapačatkova stvarałasia dla ŭrehulavańnia situacyi ŭ siektary Haza, ale paźniej pašyryła śfieru svajoj dziejnaści i ciapier, jak śćviardžajecca, zajmajecca kanfliktami va ŭsim śviecie.
Pieramovy Kušniera ź lidaram hrupoŭki stali pieršaj sustrečaj takoha ŭzroŭniu z momantu zaklučeńnia letaś pahadnieńnia ab spynieńni ahniu ŭ siektary Haza.
Pavodle źviestak, u pieramovach taksama ŭdzielničali kiraŭniki «Rady miru» — bałharski dypłamat Mikałaj Mładenaŭ i były premjer-ministr Vialikabrytanii Toni Błer, a taksama pradstaŭniki Jehipta, Katara i Turcyi — krain, jakija vystupajuć pasiarednikami ŭ mirnym pracesie.
Aficyjnych zajaŭ ab vynikach pieramoŭ zroblena nie było; paviedamlajecca tolki, što jany byli pryśviečany mieram pa razzbrajeńni CHAMAS, vyvadzie izrailskich vojskaŭ i pytańniach akazańnia humanitarnaj dapamohi.