Ci dapamoža supierkredyt na novabudoŭli i druhasnamu rynku? Piać pytańniaŭ pra ipateku pad adzin pracent
Z pačatku žniŭnia biełarusy abmiarkoŭvajuć siensacyjnuju navinu na rynku nieruchomaści. Biełarusbank pačaŭ vydavać kredyty na novabudoŭli ź ilhotnym pieryjadam na dva hady. U hety čas staŭka pa im składzie ŭsiaho 1% hadavych.
Fota: Lookby.Media
Office Life pahavaryŭ ź niezaležnaj ekśpiertkaj pa žyłoj nieruchomaści Natallaj Litoŭskaj pra toje, ci sapraŭdy hetaja ipateka vyhadnaja pakupnikam novabudoŭlaŭ i jak jana paŭpłyvaje na rynak žylla.
Ipateku pad adzin pracent prydumali, kab dapamahčy zabudoŭščykam?
Nahadajem, supierkredyt vydajuć tolki na kuplu kvater u tych zabudoŭščykaŭ, jakija stali partniorami banka. Usie jany, darečy, družna zajavili pra biesprecedentny popyt paśla startu prahramy. Vychodzić, kredyt prydumali, kab dapamahčy zabudoŭščykam u epochu vysokich koštaŭ na rynku?
— Abjomy kredytavańnia žyllovaha budaŭnictva ŭ nas vyznačaje Nacbank i davodzić ich da dziaržaŭnych bankaŭ. Žyllovaje budaŭnictva — adzin z drajvieraŭ ekanomiki. Tamu hety kredyt raspracavany dakładna nie dziela zabudoŭščykaŭ abo padtrymańnia ciapierašnich koštaŭ, a dla stymulavańnia ŭnutranaha popytu, — kaža Natalla Litoŭskaja. — Vydadzienyja ŭ vyhladzie kredytaŭ hrošy hramadzianie viernuć z pracentami. Zaadno dastanuć «z-pad padušak» valutny aščadak i «ŭlijuć» ich u ekanomiku.
Ale adnoj kuplaj kvatery sprava nie abmiažujecca.
— Ludzi buduć uładkoŭvać svajo žyllo, padtrymlivajučy rublom biełaruskich vytvorcaŭ budaŭničych i azdobnych materyjałaŭ, mebli, techniki i h. d. I ajčynny handal. Usie zaniatyja, usie atrymali hrošy, usie zapłacili padatki i adličeńni ŭ FSAN. Idealnaja schiema. Niama tych, chto prajhraŭ. Jość rost ekanomiki, — reziumuje ekśpiertka.
A banku navošta ŭsia heta historyja?
Jak doŭha buduć vydavać supierkredyt — nieviadoma. Ale vidavočna, što popyt na pradukt vysoki. Ci nie budzie dla banka nakładnym takim atrakcyjonam niečuvanaj ščodraści?
— Pakolki heta partniorskaja prahrama, to, jak tolki Biełarusbank vydaŭ čałavieku kredyt, zabudoŭščyk pavinien pieraličyć banku kamisiju ŭ pamiery 4% ad abjomu vydadzienaha kredytu. Tak pracujuć usie anałahičnyja prahramy. Nu a dalej pamiatajem: staŭka na hety kredyt «niatannaja» — 15,4% hadavych, — tłumačyć Natalla Litoŭskaja.
ŠTO JAŠČE VAŽNA VIEDAĆ PRA ŬMOVY SUPIERKREDYTU:
kredyt — ź ilhotnym pieryjadam na dva hady pad 1% hadavych, paśla staŭka składzie 15,4% (staŭka refinansavańnia +6,15 p. p.);
maksimalnaja suma kredytu moža dasiahać 100% koštu žylla;
termin kredytu — da 20 hadoŭ;
vypłata asnoŭnaj pazyki pačynajecca tolki praz 12 miesiacaŭ, heta značyć cieła kredytu ŭ hety pieryjad zastajecca niekranutym. U pieršy hod vypłačvajucca tolki pracenty za kredyt;
hrafik vypłaty — anuitetnyja płaciažy (adnolkavy ahulny płaciož).
A ci dapamoža supierkredyt tym, chto žyvie na siaredni zarobak?
Jak i ŭ vypadku ź inšymi kredytami, kankretnaja suma zaležyć ad dachodu kredytaatrymalnika. Prykinuć sumu kredytu možna z dapamohaj kalkulatara na sajcie banka.
Naprykład, pry siarednim zarobku 4 tys. rubloŭ (heta pakazčyk pa Minsku ŭ červieni) i adsutnaści inšych kredytaŭ možna pazyčyć kala 191 tys. rubloŭ. Płata ŭ pieršy hod składzie 160 rubloŭ, u druhi — 926 rubloŭ, a zatym — 2,5 tys. rubloŭ za miesiac.
A kali paśla ilhotnaha pieryjadu nie zmoža płacić za ipateku, kvateru zabiaruć?
— Bank uličvaje płaciežazdolnaść kredytaatrymalnika zychodziačy sa staŭki 15,4%, a nie sa staŭki ilhotnaha pieryjadu, — źviartaje ŭvahu ekśpiertka. — Čałavieku prosta nie daduć kredyt na sumu, płaciažy za jaki jon nie zmoža paciahnuć. Tut možna nie chvalavacca, bank sam raźličyć ryzyki.
Da taho ž, udakładniaje surazmoŭca, treba mieć na ŭvazie, što dachody nasielnictva ŭ rublach u nas, jak praviła, rastuć. Naprykład, dva hady tamu siaredni zarobak byŭ 2,3 tys. rubloŭ, a ciapier — užo 3,1 tys. rubloŭ.
A što budzie z druhasnym rynkam? Ci ŭpaduć tam ceny?
Supierkredyt dajuć tolki na novabudoŭli. Zrazumieła, pradaŭcy na «druhasnym rynku» aścierahajucca źnižeńnia popytu, a pakupniki, naadvarot, raźličvajuć na źnižeńnie koštaŭ. Ci sapraŭdy novy kredyt mocna źmienić rynak žylla?
Fota: Office Life
— Ciapier «druhasny rynak» kredytujuć 10 bankaŭ. I ŭsie jany ŭ apošnija tydni źnižali kredytnyja staŭki. A jašče hetyja kvatery možna kuplać u lizinh, u dźviuch lizinhavych kampanij staŭki navat nižejšyja za bankaŭskija, — nahadvaje Natalla Litoŭskaja. — Akramia taho, nie ŭsim, chto choča kupić kvateru, patrebna novabudoŭla. Tamu surjoznaha padzieńnia popytu na druhasnym rynku nie pradbačycca. A niama padzieńnia popytu — niama i padzieńnia koštaŭ.
Jość i jašče adzin momant: apošnim časam na «druhasnym rynku» była inšaja prablema — nievialikaja prapanova likvidnaha žylla, heta značyć kampaktnych kvater kala mietro abo bližej da centra horada.
— Tut «druhasnamu rynku» jakraz i moža dapamahčy partniorski kredyt na novabudoŭli: mahčyma, stanie bolš achvotnych pradać staroje kampaktnaje žyllo, kab pabudavać niešta bolš kamfortnaje i prastornaje, — miarkuje Natalla Litoŭskaja, ale adrazu ŭdakładniaje, što adnaznačna kazać, ci spracuje hety prahnoz, pakul rana.