Stali viadomyja abstaviny śmierci 36‑hadovaj aktrysy Paniećjer, byłoj niaviesty Uładzimira Kličko
Pry zvanku ŭ 911 prahučała słova «pieradaziroŭka».
Chiejden Paniećjer i Uładzimir Kličko
Pavodle krynic vydańnia TMZ, aktrysu znajšła miortvaj siabroŭka ŭ domie ŭ Hrynvile, štat Paŭdniovaja Karalina. Zvanok u słužbu 911 pastupiŭ u niadzielu a 13:51 pa miascovym časie. U aŭdyjazapisu vykliku hučyć słova «pieradaziroŭka» (overdose), a taksama paviedamleńnie pra toje, što paciarpiełaj robiać sardečna-lehačnuju reanimacyju.
Nieviadoma, ci mienavita chłopiec Paniećjer Brajan Chikiersan, ź jakim jana pieryjadyčna sustrakałasia, telefanavaŭ u ekstrannyja słužby.
Adnak ažyvić Paniećjer nie ŭdałosia. U 14:32 kanstatavali jaje śmierć.
Pavodle palicyi, pieršasnych prykmiet hvałtu nie vyjaŭlena, abstaviny śmierci nie vyhladajuć padazronymi.
Raniej aktrysa publična pryznavałasia, što zmahałasia z ałkaholnaj i narkatyčnaj zaležnaściu, a taksama z depresijaj.
Chiejden Paniećjer stała viadomaja dziakujučy roli Kłer Benet u sieryjale «Hieroi», a taksama zdymkam u «Nešvile», franšyzie «Kryk» i filmie «Pamiataj Tytanaŭ».
Akramia kinakarjery, aktrysa pryciahvała ŭvahu hramadskaści svaimi stasunkami z ukrainskim baksioram Uładzimiram Kličko.
Para pačała sustrakacca ŭ 2009 hodzie, praz čatyry hady abviaściła pra zaručyny, a ŭ 2014‑m u ich naradziłasia dačka Kaja. Paśla rasstańnia baćkoŭ u 2018 hodzie dziaŭčynka zastałasia žyć z Uładzimiram Kličko.