Rasijskaja rakieta «Banderol» zalacieła ŭ Małdovu i tam vybuchnuła

17 žniŭnia rasijskaja rakieta «Banderol» zalacieła ŭ pavietranuju prastoru Małdovy. Pra heta paviedamili Pavietranyja siły Uzbrojenych sił Ukrainy.

Zdymak ilustracyjny

Pa infarmacyi Nacyjanalnaj armii Małdovy, nieviadomy pavietrany abjekt byŭ zafiksavany ŭ rajonie Kučurhana — Ciraspala ŭ 17:37. Paźniej jon źnik z radaraŭ kala siała Tałmaza ŭ Štefan-Vodskim rajonie. Prykładna za try kiłamietry ad nasielenaha punkta adbyŭsia vybuch, paśla jakoha zaharełasia suchaja trava.

Na miesca zdareńnia nakiravali ekstrannyja słužby i śpiecyjalistaŭ, jakija pavinny vyśvietlić usie abstaviny incydentu i acanić jaho nastupstvy.

Praz hety incydent Małdova prykładna na 15 chvilin časova zakryvała pavietranuju prastoru ŭ centralnaj častcy krainy.

Pavodle infarmacyi ŭkrainskich Pavietranych sił, havorka išła mienavita pra rasijskuju rakietu «Banderol». Pierad hetym ukrainskija vajskoŭcy paviedamlali pra niekalki takich rakiet, jakija ruchalisia ŭ napramku Čarnamorska i Adesy.

Niekatoryja krynicy śćviardžali, što abjekt spačatku zalacieŭ na terytoryju niepryznanaha Prydniastroŭja. Vybuch čuli žychary nasielenaha punkta Pieršamajsk, raźmieščanaha kala miažy z Adeskaj vobłaściu Ukrainy.

Heta ŭžo nie pieršy padobny incydent u Małdovie ŭ žniŭni. 9 žniŭnia kala siała Krokmaz u Štefan-Vodskim rajonie vybuchnuŭ, vierahodna, rasijski bajavy bieśpiłotnik. U vyniku byli paškodžanyja niekalki pryvatnych damoŭ.

Pavodle małdaŭskich śpiecyjalistaŭ, toj aparat vybuchnuŭ na vyšyni kala 2,5 mietra paśla sutyknieńnia z drevam. U jaho abłomkach znajšli kampanienty, padobnyja da elemientaŭ kiravanaj rakiety, tamu papiarednie jaho nazvali dronam-rakietaj.

Paśla hetaha Ministerstva zamiežnych spraŭ Małdovy adklikała svajho pasła ŭ Rasii dla kansultacyj. A jašče raniej, 5 žniŭnia, u Małdovie taksama znachodzili abłomki rasijskich bieśpiłotnikaŭ «Hierań».

Kamientary da artykuła