HUR Ukrainy: Pieramirja ŭ hetym hodzie nie budzie
U płanach Pucina — zaviaršyć zachop Danieckaj vobłaści da kanca hetaha hoda.
Fota: Wolfgang Schwan / Anadolu via Getty Images
Na hety momant niama nijakich prykmiet taho, što Rasija hatovaja zaklučyć pieramirje, tamu nie varta spadziavacca na spynieńnie ahniu da kanca hoda. Pra heta zajaviŭ namieśnik načalnika Hałoŭnaha ŭpraŭleńnia raźviedki Minabarony Ukrainy hienierał-major Vadzim Skibicki ŭ intervju RBK-Ukraina.
«Analityki HUR MA Ukrainy ŭ svaim analizie zychodziać z taho, što na poli boju niama nijakich prykmiet, jakija b śviedčyli pra hatoŭnaść Rasii spynić ahoń i pačać narmalnyja pieramovy. Ich płany takija, i heta toje, pra što jany kažuć: da kanca hetaha hoda nijakich damoŭlenaściaŭ i padpisańnia mirnaha pahadnieńnia nie budzie», — skazaŭ jon.
Skibicki adznačyŭ, što ŭ płanach Pucina — zaviaršyć zachop Danieckaj vobłaści da kanca hetaha hoda.
Tak, pavodle źviestak vajskovaj raźviedki, rasijanie praciahnuć nanosić udary pa abjektach abaronna-pramysłovaha kompleksu, vajennych abjektach, enierhietycy, łahistyčnaj sistemie i AZS. Pry hetym praciŭnik bje nie tolki pa vajskovych, ale i pa cyvilnych abjektach.
«Uzimku naša najbolš uraźlivaje miesca — elektraenierhija i aciapleńnie, tamu jany taksama mohuć apynucca pad atakaj. Naprykład, nie tak daŭno rasijanie raspracavali bieśpiłotnik, pryznačany dla źniščeńnia elektryčnych apor — ŁEP. U jaho kryłach zakładzieny vybuchovy elemient, zdolny pierarezać mietał», — adznačyŭ Skibicki.
Jon taksama paćvierdziŭ, što pad pahrozaj znachodzicca i sistema vodazabieśpiačeńnia, pakolki heta adzin z krytyčna važnych elemientaŭ. Akramia taho, vosieńniu i zimoj pad udarami znoŭ mohuć apynucca hazatranspartnaja sistema i zdabyča hazu ŭ Pałtaŭskaj i Charkaŭskaj abłaściach, jakija praciŭnik užo atakavaŭ raniej.
Skibicki taksama adznačyŭ, što ŭ płanach ahresara jość i masty praz Dniapro, pakolki heta taksama krytyčnaja infrastruktura.
«Rasijskija vojski apošnim časam bjuć pa mastach u pryfrantavych abłaściach — na Sumščynie, Charkaŭščynie, Čarnihaŭščynie. Jany sistemna atakujuć krytyčna važnyja masty ŭ Zatocy i Majakach, jakija źjaŭlajucca vielmi važnymi elemientami našaj transpartnaj sistemy. Kali abjekt stanovicca najbolš krytyčnym dla nas — tady praciŭnik pačynaje pa im pracavać», — padkreśliŭ jon.