Va Ukrainie raspracoŭvajuć stratehiju adnosin ź Biełaruśsiu
Stratehija adnosin Ukrainy ź Biełaruśsiu ŭžo raspracoŭvajecca. Paśla zaviaršeńnia pracy nad dakumientam jaje pradstaviać narodnym deputatam. Pra heta zajaviŭ vykanaŭca abaviazkaŭ ministra zamiežnych spraŭ Andrej Sibiha padčas vystupleńnia ŭ Viarchoŭnaj Radzie ŭ jakaści kandydata dla zaćviardžeńnia na hetu pasadu, paviedamlaje ahienctva «Ukrinfarm».
Andrej Sibiha. Fota: AP Photo / Efrem Lukatsky
Pa słovach Andreja Sibihi, dakumient spačatku budzie pradstaŭleny ŭ parłamienckim kamitecie pa pytańniach zamiežnaj palityki i mižparłamienckaha supracoŭnictva, paśla čaho ź jaho źmiestam aznajomiać inšych deputataŭ.
Sibiha padkreśliŭ, što biełaruski napramak pa-raniejšamu stvaraje pahrozu dla biaśpieki Ukrainy i Jeŭropy. Jon taksama zajaviŭ, što Biełaruś niasie adkaznaść razam z Rasijaj za ahresiju suprać Ukrainy, a režym Alaksandra Łukašenki, na jaho dumku, pavinien być pryciahnuty da adkaznaści.
Dypłamat adznačyŭ, što Ukraina ŭžo vypracavała asnoŭnyja padychody da palityki ŭ dačynieńni da Biełarusi. Pavodle jaho słoŭ, ukrainskija ŭłady naładzili supracoŭnictva ź biełaruskimi demakratyčnymi siłami. U Ministerstvie zamiežnych spraŭ taksama pryznačyli pasła pa asablivych daručeńniach, jaki adkazvaje za biełaruski napramak.
Sibiha zajaviŭ, što hety kirunak buduć i nadalej uzmacniać na instytucyjnym uzroŭni.
Paźniej u toj ža dzień Viarchoŭnaja Rada pryznačyła Andreja Sibihu ministram zamiežnych spraŭ Ukrainy.
Čytajcie taksama:
Błohiera Zołkina, jaki braŭ skandalnaje intervju ŭ Babaryki, mabilizavali
Sajt, na jakim biełarusaŭ vierbavali dla vajny z Ukrainaj, źnik adrazu jak pra jaho napisali ŚMI