Chirurh asprečyŭ hałoŭnyja mify pra ŭkusy i vydaleńnie klaščoŭ
Doktar Charytončyk, naprykład, rekamienduje nie ŭskładniać sabie žyćcio nitkami i inšymi narodnymi srodkami, a kupić u aptecy adnu reč.
Doktar pryjomnaha adździaleńnia Respublikanskaha navukova-praktyčnaha centra dziciačaj chirurhii Vasil Charytončyk raźviančaŭ raspaŭsiudžanyja mify pra nastupstvy nieakuratnaha vydaleńnia parazita, pišuć Minsk-Naviny.
Ništo tak nie azmročvaje ciopły letni dzień, jak vyjaŭleny na ciele klešč. Pryčym paniku časta vyklikaje nie stolki sam ukus, kolki strach pierad mahčymym zaražeńniem.
— Ničoha strašnaha nie adbudziecca, kali vy vyciahniecie klašča nie zusim pravilna. Na ryzyku raspaŭsiudžvańnia infiekcyi heta nijak nie ŭpłyvaje, — rastłumačyŭ śpiecyjalist.
— Ci abaviazkova zachvareje čałaviek, kali klešč byŭ zaražany?
— Zusim nie, — supakoiŭ doktar. — Navat pry ŭkusie zaraznaha klašča patahieny traplajuć u arhanizm daloka nie zaŭsiody. Ale kali heta i adbyłosia, zaražeńnie nie harantavana.
Zdavać vyniataha klašča na analiz taksama nie zaŭsiody metazhodna: daśledavańni časta dajuć padmanna stanoŭčyja vyniki, dy i sam praces patrabuje času. Značna bolš efiektyŭnaj źjaŭlajecca prafiłaktyčnaja doza antybijotyka (adnarazovaja doza daksicyklinu 200 mh dla dziaciej ad vaśmi hadoŭ). Pry hetym paddavacca panicy i śpiašacca nie treba: na ekstrannuju prafiłaktyku jość da troch sutak.
— Jaki sposab vydaleńnia klašča najbolš efiektyŭny?
Doktar Charytončyk rekamienduje nie ŭskładniać sabie žyćcio nitkami i inšymi narodnymi srodkami, a nabyć u aptecy abo na markietplejsach prystasavańnie dla vydaleńnia klaščoŭ.
— Vyhladaje jano jak minijaciurny dvuchzuby videlec z prarezam. Klešč padčeplivajecca zboku la samaj asnovy skury i akuratna vykručvajecca biez zdušvańnia bruška. Kaštuje kapiejki, a vynik zaŭsiody efiektyŭny: zrabić niešta niapravilna prosta nie atrymajecca, — dadaŭ jon.