Na Wildberries mocna vyraśli prodažy tavaraŭ ź biełaruskimi matyvami
Analityki markietpłejsa Wildberries zafiksavali hetym letam rezki rost popytu siarod biełarusaŭ na tavary z nacyjanalnaj matyvami — vasilkami, kałasami, arnamientami i h. d. Pra heta «MP» raspaviali ŭ pres-słužbie kampanii.
Vasilki i kałasy stali adnym z hałoŭnych chitoŭ leta
Adnym z najbolš zaŭvažnych trendaŭ stali posud i kuchonnyja pryłady z falkłornymi malunkami. Biełarusy stali čaściej kuplać talerki, kubki, padnosy, nabory dla čajavańnia i inšaje načyńnie ŭ etničnym styli.
Asabliva ŭražalnuju dynamiku pakazali miski i sałatniki z vyjavami vasilkoŭ i kałasoŭ. Hetym letam ich prodažy vyraśli ŭ 28 razoŭ u paraŭnańni ź minułym hodam.
Nacyjanalnaja tematyka zaŭvažna dadała papularnaści i ŭ katehoryi chatniaha tekstylu. Paścielnuju bializnu z vyjavami biełaruskich piejzažaŭ kuplali ŭ 18 razoŭ čaściej, a navałački z arnamientami i padkoŭdraniki z tradycyjnymi ŭzorami — u siem razoŭ.
Dobruju dynamiku taksama pakazali abrusy ź lnianymi karunkami i pakryvały z narodnymi matyvami.
Fihurki i statuetki z narodnymi matyvami stali kuplać na 662% čaściej. Takija pradmiety dla pakupnikoŭ stanoviacca nie prosta ŭpryhožvańniem doma, a sposabam dadać u interjer čaścinku biełaruskaj kultury.
Asobny trend hetaha siezona — tavary dla rukadziella.
Prodažy tkanin dla rukadziella z nacyjanalnymi pryntami vyraśli na 1350%, mołdaŭ i trafaretaŭ dla tvorčaści ź biełaruskimi matyvami — na 300%.
Nacyjanalnyja matyvy zaŭvažnyja i ŭ adzieńni. Prodažy śvitšotaŭ z vyšyŭkaj i arnamientami vyraśli na 1050%, futbołak ź biełaruskaj simvolikaj i tematyčnymi pryntami — na 660%.
Pakupniki taksama vybirajuć štany, spadnicy, sarafany i błuzki z elemientami narodnaha kaściuma, adzieńnie dla dziaciej ź biełaruskimi ŭzorami i roznyja aksiesuary z nacyjanalnaj tematykaj.
Analityki Wildberries adznačajuć, što biełarusy stali čaściej cikavicca knihami pra kulturu, ramiostvy i pryrodu krainy. U košykach źjaŭlajucca kalendary ź biełaruskimi krajavidami, štodziońniki i sšytki z nacyjanalnaj simvolikaj, nalepki i kancylarskija tavary z arnamientami.
Vyras popyt i na asobnyja pradukty i tavary dla dziaciej. Prodažy tavaraŭ dla niemaŭlat ź biełaruskimi matyvami — na 1300%, padarunkavych naboraŭ biełaruskaj kaśmietyki — na 100%.