«Kładziom na sumleńnie!» Čym žyvie Vadzim Hałyhin

Biełaruski šoŭmien Vadzim Hałyhin adčuvaje siabie ŭ Rasii jak ryba ŭ vadzie. Ciapier jon viadzie bujnyja prajekty na rasijskim telebačańni, zdymajecca ŭ sieryjale z dvuchsensoŭnaj nazvaj i płanuje ŭšanavać uspaminy rasijskich akupantaŭ.

Fota: vadimgalygin / Instagram

U pačatku žniŭnia ŭ Rasii pačali zdymać novy sieryjał «Kładziom na sumleńnie!» dla kanała TNT. Heta historyja pra maładzionaŭ Sašu i Vadzika, jakija jeduć u rasijskuju hłuchmień, kab prachodzić praktyku pa ŭkładvańni darožnaha pałatna. Tam jany traplajuć u suvory mužčynski kalektyŭ — vyhladaje, siužet jakraz budzie pabudavany na ŭzajemadziejańni ŭčarašnich studentaŭ i taho kalektyvu.

Adnu z hałoŭnych rolaŭ addali biełarusu Vadzimu Hałyhinu. Kažuć, što tuju rolu jakraz pisali pad jaho. Vytvorčaściu prajekta zajmajecca rasijskaja kampanija «Vzor», dzie Hałyhin źjaŭlajecca adnym z saŭładalnikam. Jon zarehistravaŭ kampaniju ŭ krasaviku 2026‑ha razam z byłym rasijskim komikam Alaksandram Turkinym i z Uładzimiram Mikuličam, pradziusaram rodam ź Biełarusi. 

A ŭ kastryčniku vychodzić multfilm, u jakim Hałyhin daŭ svoj hołas adnamu ź piersanažaŭ — «Pryhody mamancianiaci. U pošukach mamy». Heta pierapracoŭka znakamitaj savieckaj kazki pra mamanciania, voś tolki vyhladaje, što pa charaktary heta budzie zusim inšaja stužka.

Miarkujučy pa trejlery, Hałyhin ahučvaje tak zvanaha MS Tupika — ptušania-repiera. Kali mamanciania hublajecca i zastajecca biez mamy, Tupik ciahnie jaho na afrykanski konkurs talentaŭ, dzie sam choča vystupić. I pakolki heta rola repiera, Hałyhin dziela ahučki pasprabavaŭ čytać rep.

Šoŭmien časta viadzie pieradačy na rasijskich kanałach, ale pryjazdžaje i ŭ Biełaruś. Naprykład, jon byŭ u Minsku ŭ siaredzinie lipienia 2026-ha, kali tudy pryjechała Aryna Sabalenka dziela adkryćcia novych tenisnych kortaŭ. Hałyhin naviedaŭ toje adkryćcio i zapościŭ foty z byłym tenisistam Maksimam Mirnym i byłym futbalistam Dźmitryjem Baham.

Jość u jaho i inšyja suviazi sa sportam — Hałyhin nie pieršy hod źviazany z kamandaj «Art-Stars». Tam razam hulajuć viadomyja biełarusy i prafiesijnyja futbalisty, čas jakich prajšoŭ.

Vadzim nie zabyvaje pra dabračynnaść — praŭda, u jaho jana častkova nakiravanaja na rasijskich vajskoŭcaŭ. Jon — vice-prezident mižnarodnaha tavarystva «Rybaki U Palaŭničyja». 19 maja 2026 hoda toje tavarystva zładziła kancert Alaksandra Razenbauma, rezidenta hetaha tavarystva i prychilnika vajny va Ukrainie, jaki znachodzicca pad piersanalnymi ŭkrainskimi sankcyjami. Na kancert pryvieźli 1800 padletkaŭ, u tym liku suvoraŭcaŭ i dziaciej rasijskich vajskoŭcaŭ, jakija viaduć zachopnickuju vajnu va Ukrainie.

A ŭ červieni 2026‑ha biełarus paviedamiŭ, što rychtuje prajekt pra rasijskich sałdat. Hałyhin choča źbirać uspaminy rasijskich vajskoŭcaŭ pa listach, zapiskach i dziońnikach — jak jon patłumačyŭ žurnalistam, «duša tak patrabuje». Taksama da vychadu rychtujuć sieryjał «Advarotny bok miedala» pra rasijskich vajakaŭ — Hałyhin tam zajaŭleny jak adzin z hienieralnych pradziusaraŭ.

Što da asabistaha, niekalki miesiacaŭ tamu ŭ Vadzima naradziŭsia treci syn, małoha nazvali Łukoj. Pry hetym u Hałyhina jość darosłaja dačka Taisija, jakaja ŭ 2025‑m naradziła jamu ŭnuka.

Vadzim redka śpiavaje, ale da 9 maja 2026 hoda jon vypuściŭ novy trek pad nazvaj «Tańka». U prypievie jon ad asoby tankista źviartajecca ŭ liście da dziaŭčyny i prosić jaje dačakacca jaho, a list toj nibyta piša ŭ padpalenym tanku i «na radki kapaje brania». Pieśnia, jakuju vidavočna płanavali rabić vajennaj, hučyć dziŭna.

Kamientary da artykuła