Na Mahiloŭščynie zatrymali arhanizatarku eskort-ahienctva
U Mahiloŭskaj vobłaści milicyja zatrymała 24‑hadovuju inšaziemku, jakuju padazrajuć u arhanizacyi eskort-ahienctva i ŭdziele ŭ schiemie seksualnaj ekspłuatacyi ludziej.
Skrynšot ź videa
Supracoŭniki ŭpraŭleńnia pa supraćdziejańni handlu ludźmi UUS Mahiloŭskaha abłvykankama razam z kalehami z centralnaha aparatu MUS spynili sprobu vyvieźci hramadzianku Biełarusi za miažu dla seksualnaj ekspłuatacyi.
Pavodle źviestak siłavikoŭ, zatrymanaja była adnoj z arhanizataraŭ anłajn-eskort-ahienctva i dziejničała ŭ tym liku na terytoryi Biełarusi. Jana zavierbavała 23‑hadovuju žycharku Mahilova, jakoj prapanavali pracu ŭ Zachodniaj Jeŭropie z vysokim zarobkam, dobrymi ŭmovami pražyvańnia i lehalnym pracaŭładkavańniem. Nasamreč dziaŭčynu płanavali prymusić zajmacca prastytucyjaj, adnak vyvieźci za miažu nie paśpieli.
Padčas dalejšaj pravierki vyśvietliłasia, što zatrymanaja moža być datyčnaja i da inšych pravaparušeńniaŭ. Pavodle viersii śledstva, jana ŭciahvała zamiežnych hramadzian u zaniatki prastytucyjaj, a taksama pryvoziła žančyn u Biełaruś dla pracy ŭ zhadanym eskort-ahienctvie.
Ciapier milicyja vyśviatlaje ŭsich udzielnikaŭ mierkavanaj złačynnaj schiemy, ich roli i suviazi.
Śledčyja raspačali kryminalnuju spravu pa fakcie arhanizacyi i vykarystańnia zaniatkaŭ prastytucyjaj. Za hetaje złačynstva zakanadaŭstvam praduhledžana pakarańnie až da 10 hadoŭ pazbaŭleńnia voli. U dačynieńni da zatrymanaj pravodziacca śledčyja dziejańni i vyrašajecca pytańnie ab abrańni joj miery strymańnia.
Tym, chto płanuje pracaŭładkavacca za miažoj, pierad pajezdkaj rajać staranna praviarać pracadaŭcu, umovy pracy i zakonnaść prapanavanaj vakansii.
Čytajcie taksama:
U Kanadzie małady biełarus kiravaŭ suteniorskaj sietkaj, siedziačy ŭ miascovym SIZA
U Šumilinie maci sama dałučyła 16‑hadovuju dačku da prastytucyi
32‑hadovuju minčanku abvinavačvajuć u tym, što jana stvaryła sietku prastytucyi