Tramp choča nazvać svaim imieniem avijanosiec

Vajskova-marskija siły ZŠA abmiarkoŭvajuć mahčymaść pierajmienavać avijanosiec, jaki ciapier budujecca pad papiaredniaj nazvaj USS Doris Miller, u honar prezidenta Donalda Trampa. Pra heta paviedamlajuć CNN i NBC News sa spasyłkaj na daśviedčanyja krynicy.

Donald Tramp. Fota: AP Photo / Mark Schiefelbein

Kali takoje rašeńnie prymuć, to jano stanie biesprecedentnym: raniej nivodzin amierykanski avijanosiec nie nazyvaŭsia ŭ honar prezidenta, jaki na toj momant znachodziŭsia na pasadzie.

Pieršapačatkova avijanosiec kłasa «Ford» vyrašyli nazvać u honar Dorysa «Dory» Milera — čarnaskuraha matrosa VMS ZŠA, jaki prasłaviŭsia padčas napadu Japonii na Piorł-Charbar. Pra heta VMS abviaścili ŭ studzieni 2020 hoda, padčas pieršaha prezidenckaha terminu Trampa. Pavodle CNN, pytańnie ab pierajmienavańni karabla abmiarkoŭvajecca jašče z pačatku 2026 hoda.

Pry hetym VMS razhladajuć mahčymaść nazvać imiem Milera inšy vajskovy karabiel. Jaho taksama vyłučyli na atrymańnie Miedala Pašany — najvyšejšaj vajskovaj uznaharody ZŠA. Tomas Błedsou, unučaty plamieńnik Milera, zajaviŭ, što siamji pra źmienu płanaŭ nie paviedamlali.

Jak paviedamlaje CNN, u samich VMS karabiel užo faktyčna pierastali nazyvać USS Doris Miller i vykarystoŭvajuć jahony bartavy numar CVN-81. U niadaŭnim ukazie Biełaha doma ab raźvićci vajskovaha karablebudavańnia jon taksama zhadvaŭsia tolki jak CVN-81.

Vajskova-marskim siłam nieabchodna vyznačycca z nazvaj da cyrymonii zakładki kila, jakaja čakajecca ŭ kancy hetaha hoda. Pieradača avijanosca fłotu, pavodle USNI News, adbudziecca nie raniej za 2034 hod.

Prava davać nazvy vajskovym karablam naležyć ministru VMS, adnak ministr abarony zvyčajna taksama aktyŭna ŭdzielničaje ŭ vybary nazvaŭ dla avijanoscaŭ. Tamu kančatkovaje rašeńnie buduć prymać ministr abarony Pit Chiehsiet i vykanaŭca abaviazkaŭ kiraŭnika VMS ZŠA Chunh Kaa.

Dorys Miler słužyŭ u VMS z 1939 hoda i pracavaŭ pamočnikam u stałovaj. Jon nie mieŭ śpiecyjalnaj padrychtoŭki pa abychodžańni ź zienitnaj zbrojaj, ale padčas ataki na Piorł-Charbar zaniaŭ miesca kala kulamiota i adkryŭ ahoń pa japonskich samalotach. Paśla hetaha Miler dapamahaŭ evakujavać paranienych.

U 1942 hodzie admirał Čester Nimic uznaharodziŭ jaho Vajskova-marskim kryžam. Prykładna praz hod Miler zahinuŭ u bitvie pry Makinie paśla taho, jak japonskaja tarpieda trapiła ŭ jahony karabiel.

Kamientary da artykuła