Zaviaršajecca rekanstrukcyja «Karablika» — samaha admietnaha korpusa BNTU

U BNTU zaviaršajuć rekanstrukcyju 15‑ha navučalnaha korpusa, jaki z 1 vieraśnia pavinien znoŭ pryniać studentaŭ i vykładčykaŭ. Paśla abnaŭleńnia budynak staŭ nie prosta miescam dla lekcyj i praktyčnych zaniatkaŭ, a bolš sučasnaj prastoraj dla vučoby, adpačynku i charčavańnia, piša Domovita.by.

Fota: pres-słužba Miedyjacentra BNTU

Korpus składajecca ź dźviuch častak — 15‑paviarchovaj i 8-paviarchovaj. Daŭžynia adnaho z kalidoraŭ u nižniaj častcy dasiahaje 130 mietraŭ.

Unutry źjavilisia vialikija aŭdytoryi roznych farmataŭ, sučasnyja łabaratoryi i pamiaškańni dla praktyčnych zaniatkaŭ. U aŭdytoryjach ustalavali sistemy aŭtamatyčnaha zaciamnieńnia: mataryzavanyja žaluzi dazvolać rehulavać aśviatleńnie ŭ zaležnaści ad patreby.

Fota: pres-słužba Miedyjacentra BNTU

Trapić na terytoryju korpusa možna budzie praz turnikiety. Na pieršym paviersie raźmiaścili vialiki harderob, a na druhim zrabili prastorny choł. Tam zachavali fresku ź simvolikaj čatyroch fakultetaŭ, studenty jakich buduć vučycca ŭ hetym budynku.

Fota: pres-słužba Miedyjacentra BNTU

Pamiž pavierchami buduć pracavać dzieviać sučasnych liftaŭ. Taksama praduhledžana śpiecyjalnaje abstalavańnie dla ludziej z abmiežavanaj mabilnaściu.

Asablivuju ŭvahu nadali miescam dla adpačynku i samastojnaj pracy. U korpusie adkryjucca biblijateka i čytalnaja zała ź miakkaj meblaj i kanapami. Tam studenty zmohuć rychtavacca da zaniatkaŭ, pracavać nad hrupavymi prajektami abo adpačyvać pamiž parami. Na trecim paviersie abstalavali zonu adpačynku z łaŭkami. Taksama budzie pracavać kapiravalny centr.

Fota: pres-słužba Miedyjacentra BNTU

Dla studentaŭ praduhledzieli i mahčymaści pierakusić. U korpusie adkryjecca bufiet z novaj technikaj i vitrynami. Tam buduć pradavać vypiečku, haračyja stravy, sałaty i lohkija pierakusy. Akramia taho, u budynku pastaviać kavavyja aŭtamaty.

Paŭnavartasna paabiedać možna budzie ŭ stałovaj № 4 BNTU, jakaja znachodzicca nasuprać korpusa na praśpiekcie Niezaležnaści, 146.

Źmianiłasia i terytoryja vakoł budynka. Zialonuju zonu abnavili, zrabili piešachodnyja darožki i miescy dla adpačynku. Na kłumbach płanujuć stvaryć vialikuju kvietkavuju kampazicyju.

Fota: pres-słužba Miedyjacentra BNTU

Dla aŭtamabilaŭ za korpusam abstalavali novuju stajanku na 70 miescaŭ, jašče 20 miescaŭ pryznačanyja dla vykładčykaŭ. Taksama abnavili raźmietku i ŭparadkavali parkoŭki.

Pierymietr korpusa ciapier zakryty sučasnaj aharodžaj ź sistemaj biaśpieki. 

Kamientary da artykuła